विवादको घेरामा प्रकाशको ‘सकम्बरी’: सार्वजनिकको ४ दिनमा ६४ लाख भ्युज

इटहरी/ क्रीयटिभ मेकरको रुपमा पर्छन् गायक प्रकाश सपूत । उनको दोहोरो ब्याटलदेखी बोल माया, गलबन्दी, पिर हुँदै पर-पर छु सम्म आईपुग्दा उनले समाजको यथार्थलाई संगीत र भिडियोको माध्यमबाट प्रस्तुत गरेका छन् । पछिल्लो समय सार्वजनिक ‘सकम्बरी’ मा पनि त्यही समाजमा घटेका यथार्थलाई उठान गर्दै गीत तथा भिडियो निर्माण गरेका छन् । तर, सो गीतको यतिबेला सामाजिक संजालमा चर्को बिरोध र आलोचना भैरहेको छ ।

एकैछिन यो विरोध र आलोचना भन्दा पर रहेर हेर्ने हो भने भिडियो सार्वजनिक भएको ४ दिनमै ६४ लाख बढिले युट्युबमा हेरेका छन् भने युट्युब ट्रेन्डिङको पहिलो स्थानमा छ । भ्युज निरन्तर उकालो लाग्ने क्रममा छ । उता छोटो भिडियो साझेदारी साइट टिकटकमा लाखौ भिडियो बनेका छन् ‘सकम्बरी’को गीतका टुक्रा प्रयोग गर्दै । एकचोटि सुन्दै मुखमा झुण्डिने लय गीतमा समावेश गरिएको छ भने भिडियोकि प्रमुख पात्र कुशुम शर्माको अभिनय मक्खै पार्ने छ । मोडलिङमा उनको यो पहिलो यात्रा हो । पहिलो यात्रामै ठेस त लाग्यो तर, उनको अभिनय तारिफ योग्य छ । छोटो समयमा स्टार अभिनेत्री तथा मोडल बन्ने प्रमाण सकम्बरीमा पेस गरेकी छन् ।

चारै तिर गीतको विरोध भैरहदा उनको अभिनय हेर्ने र त्यसबारे लेख्ने धेरैलाई खासै फुर्सदै मिलेको देखिएन । भिडियोको अन्त्यसम्म हेर्ने हो भने ‘पुरुषतन्त्र’ हावी भएको प्रष्ट हुन्छ । जुन कुरालाई फुलमायाबाट सकम्बरी भएकी ती पात्रले एक्लै फाईट गर्छिन् । उनको बोलिमा दम छ । समग्र महिला वर्गको उनले एक्लै प्रतिनिधित्व गरेकी छन् भन्दा पक्कै फरक नपर्ला । समस्यै समस्या अनि आर्थिक अभावमय परिवारको जिम्मेवारी आफ्नो काधमा आईपर्दा एक गाउकी फुलमाया शहर पुगेपछि कसरी सकम्बरी बन्न पुग्छिन् भन्ने कथा यो भिडियोले बोल्छ ।