इटहरी/आगामी आर्थिक वर्ष २०८२/८३ का लागि सार्वजनिक बजेटमार्फत सरकारले फिल्म छायांकनका लागि आवश्यक पूर्वाधार निर्माणमा निजी क्षेत्रलाई प्रोत्साहित गर्ने नीति अघि सारेको छ।बिहीबार संसदमा बजेट प्रस्तुत गर्दै अर्थमन्त्री विष्णु पौडेलले नेपाली मौलिक कला र संस्कृतिको प्रवर्द्धन तथा स्वदेशी र विदेशी फिल्महरूको छायांकनलाई सहज बनाउने उद्देश्यसहित इन्डोर तथा आउटडोर फिल्म स्टुडियो निर्माणमा निजी क्षेत्रलाई सहभागी गराउने घोषणा गरेका हुन्।
“नेपाली मौलिक कला, संस्कृतिको प्रवर्द्धन र स्वदेशी तथा विदेशी फिल्मको छायांकनलाई सहज बनाउन इन्डोर तथा आउटडोर स्टुडियो निर्माणका लागि निजी क्षेत्रलाई प्रोत्साहित गरिनेछ,” अर्थमन्त्री पौडेलले बजेट भाषणमा उल्लेख गरे।
हाल देशमा स्तरीय फिल्म छायांकन स्टुडियोको अभावका कारण धेरै फिल्म युनिटहरू विदेशी स्थान रोज्न बाध्य छन्। सरकारले यो अभाव हटाउने गरी निजी लगानीमार्फत स्टुडियो निर्माण अघि बढाउने योजना सार्वजनिक गरेको हो।नीति कार्यान्वयनमा आएमा छायांकन सहज हुनुका साथै फिल्म निर्माण लागतमा कटौती, रोजगारी वृद्धि तथा पर्यटन प्रवर्द्धनमा समेत टेवा पुग्ने सरकारको अपेक्षा छ।
@parikalanewsofficial
Discussion about this post