बलिउडको यशराज स्टुडियोमा प्रियंकाको ‘मास्टरनी’को पोस्ट प्रोडक्सन हुँदै

इटहरी/ बलिउडको सबैभन्दा ठूलो र प्रतिष्ठित स्टुडियो ‘यशराज फिल्म्स’मा आफ्नो फिल्मको काम गर्न पाउनु जो-कोही फिल्ममेकरको लागि ठूलो सपना हो । यतिबेला नेपाली अभिनेत्री प्रियंका कार्की त्यही सुन्दर सपना बाँचिरहेकी छिन् । आफ्नो पहिलो फिचर फिल्म ‘मास्टरनी’को पोस्ट-प्रोडक्सनका लागि मुम्बईको यश राज फिल्मस् स्टुडियो पुगेकी प्रियंकाको खुसी त्यतिबेला झन् दोब्बर भयो, जतिबेला उनको भेट बलिउडका ‘झक्कास’ अभिनेता अनिल कपुरसँग भयो ।

सामाजिक सञ्जालमा ऊर्जाशील र भावुक स्ट्याटस लेख्दै प्रियंकाले यसलाई आफ्नो जीवनकै एक विशेष दिनको रूपमा व्याख्या गरेकी छिन् । जीवनका अवसरहरूप्रति कृतज्ञता जनाउँदै उनले ‘मास्टरनी’को काम यशराज स्टुडियोमा हुनु आफ्नो लागि एउटा ठूलो सपना साकार भएको बताएकी छिन् ।

स्टुडियोमा काम चलिरहँदा बलिउड लेजेन्ड अभिनेता अनिल कपुरसँगको भेटलाई प्रियंकाले ‘पूर्ण फ्यानगर्ल झक्कास पल’ भनेकी छिन् । अनिल कपुरको तारिफ गर्दै उनले लेखेकी छिन्, “एक मात्र अनिल कपुर सरलाई भेट्दाको त्यो पूर्ण ‘फ्यानगर्ल झक्कास’ पल!!! उहाँ आइकन, लेजेन्ड र ऊर्जाको खानी हुनुहुन्छ ।”

@parikalanewsofficial

असाध्यै मनपर्ने सँग काम गर्न पाएकोमा आफूलाई भाग्यमानी ठान्दै प्रियंकाले यो दिनलाई कहिल्यै नभुल्ने क्षणको रूपमा लिएकी छिन् । “केही दिनहरू साँच्चै एकदमै विशेष लाग्छन्, आजको दिन तिनै मध्ये एक थियो । खुसी मन,” भन्दै उनले आफ्नो उत्साह फ्यानमाझ साटेकी छिन् । प्रियंकाको यो पोस्टले एकातिर ‘मास्टरनी’ प्राविधिक रूपमा उच्च स्तरमा तयार भइरहेको संकेत दिएको छ भने अर्कोतिर यशराज स्टुडियोको माहोलले दर्शकहरूमा फिल्मप्रतिको कौतूहलता अझ बढाएको छ ।