कलिला काँधमा ‘फर्स्ट’ हुने भारी: शिक्षा प्रणालीको चिरफार गर्दै ‘रोल नं १’ को गीत सार्वजनिक

इटहरी/ बालबालिकाको काँधमा किताबको भारी झोला मात्र छैन, सधैँ ‘पहिलो’ हुनुपर्ने सामाजिक र पारिवारिक दबाबको नदेखिने पहाड पनि छ । साथीहरूसँग भलिबल खेल्ने र रमाउने उमेरका बालबालिका कसरी घोकन्ते अर्थात् रट्टा मार शिक्षाको चपेटामा परेका छन् भन्ने गम्भीर विषय उठान गर्दै प्रतीक्षित फिल्म ‘रोल नं १’ को टाइटल गीत सार्वजनिक भएको छ । सेभेन सिज सिनेमाको ब्यानरमा निर्माण भएको यस फिल्मको सार्वजनिक गीतमा प्रशान्त शिवाकोटीको मर्मस्पर्शी शब्द, सङ्गीत तथा स्वर सुन्न सकिन्छ ।

विद्यालयमा पहिलो हुनेलाई मात्र सम्मान दिने र “अरू सबै मुर्ख, एउटै मात्र विद्वान” ठान्ने हाम्रो समाजको संकुचित सोचमाथि गीतले कडा व्यङ्ग्य प्रहार गरेको छ । भिडियोमा म्याग्दीका हिमाली भेगका ढुङ्गे घर र ग्रामीण जनजीवनलाई कलात्मक रूपमा उतारिएको छ । एकातिर मैनबत्तीको मधुरो उज्यालोमा अबेरसम्म पढ्न बाध्य बालकको दृश्य छ भने, अर्कोतिर उसको निमोठिएको बालपन र दबाइएका रहरहरूले दर्शकको मन छुन्छ । हेर्नुस् भिडियो ।

जोन योञ्जनको निर्देशनमा तयार भएको यस फिल्मले गलत शैक्षिक प्रणालीले बालबालिकाको भविष्य उज्यालो बनाउनुको साटो उल्टै कस्तो मानसिक असर पारिरहेको छ भन्ने मुख्य कथावस्तु बोकेको छ । महेश दवाडीको लेखन रहेको यस फिल्मले स्लोगन जस्तै साँच्चिकै ‘हरेक विद्यार्थीको कथा’लाई पर्दामा ल्याउने जमर्को गरेको छ । फिल्म ‘रोल नं १’मा मुकुन भुसाल, सुशांक मैनाली, रेणु योगी, सिर्जना अधिकारी लगायतका कलाकारहरुको प्रमुख भूमिकामा अभिनय रहेको छ भने बाल कलाकार निर्भिक रेग्मी, रिन्चेन लामा, संयम कटुवाल, सिजल श्रेष्ठको पनि अभिनय रहेको छ ।

@parikalanewsofficial

फिल्मको निर्माता विनोद पौडेल हुन् भने सह-निर्माता जान्वी पौडेल, छत्रमाया गिरी र रमेश चौलागाईं रहेका छन् । यो फिल्म आउँदो जेठ १५ गते गणतन्त्र दिवसको अवसर पारेर नेपाल र विदेशका हलहरूमा एकसाथ प्रदर्शनमा आउनेछ । नेपालभर यो फिल्म वितरणको जिम्मा ‘रिच इन्टरटेन्मेन्ट’ र ‘जे एम सिनेमा’ले लिएका छन् । गीतले फिल्मको बलियो कथावस्तु र अपिलिङ थिमको छनक दिएसँगै दर्शक तथा समीक्षकहरूमा फिल्म प्रतिको प्रतीक्षा झनै बढेको छ ।