इटहरी/ लामो समयको प्रतीक्षापछि अभिनेत्री रेखा थापाको निर्देशनमा तयार भएको नयाँ फिल्म ‘माया भनेकै यस्तो होला’को प्रदर्शन मिति औपचारिक रूपमा घोषणा गरिएको छ । निर्माण पक्ष र वितरकबीच भएको सहमतिअनुसार यो फिल्म आगामी भदौ २६ गते देशभरका फिल्म हलहरुमा एकसाथ प्रदर्शनमा आउनेछ । यसअघि तीजको छेको पारेर रिलिज गर्ने भनिए पनि ठोस मिति तोकिएको थिएन । अब भने नेपाली नारीहरूको महान् चाड तीज र कुशे औंसी अर्थात् बुबाको मुख हेर्ने दिनको विशेष अवसर पारेर फिल्म दर्शकमाझ ल्याउन लागिएको हो ।
नेपाली फिल्म क्षेत्रकी ‘मेगास्टार’ मानिने रेखा थापाले यसै फिल्ममार्फत ८ वर्षपछि निर्देशनमा पुनरागमन गरेकी छन् । यसअघि ‘हिम्मतवाली’ र ‘मालिका’ जस्ता सफल फिल्मको निर्देशन गरिसकेकी रेखाको यो तेस्रो निर्देशकीय प्रोजेक्ट हो ।
विशेष कुरा के छ भने, रेखा यस पटक अभिनयमा नभई पूर्ण रूपमा निर्देशनमा मात्र केन्द्रित छिन् । साथै, आफ्नै घरेलु ब्यानर ‘रेखा फिल्मस्’ बाट बाहिर निस्किएर बाहिरी ब्यानरको फिल्म निर्देशन गर्ने उनी सम्भवतः नेपालकै पहिलो स्थापित महिला निर्देशक बनेकी छन् ।
@parikalanewsofficial
‘दिया एण्ड अमु फिल्मस्’ को ब्यानरमा निर्माण भएको यस फिल्मको अर्को प्रमुख आकर्षण यसको ‘स्टारकास्ट’ हो । फिल्ममा एकसाथ ४ जना पूर्व मिस नेपालहरूले अभिनय गरेका छन् । फिल्मको मुख्य भूमिकामा मदनकृष्ण श्रेष्ठ, दिल श्रेष्ठ, पूर्व मिस नेपाल सृष्टि श्रेष्ठ, पूर्व मिस नेपाल नम्रता श्रेष्ठ र पूर्व मिस नेपाल इन्टरनेसनल नीति शाह रहेका छन् । यस्तै विशेष भूमिकामा पूर्व मिस नेपाल उषा खड्गी रहेकी छन् । फिल्ममा लक्ष्मी गिरी, विशाल पहाडी, संगम भण्डारी, रवि डंगोल, सुनिता श्रेष्ठ र विनोद पौडेल को पनि अभिनय रहेको छ ।
फिल्मको निर्माता हरि नारायण श्रेष्ठ र माया देवी श्रेष्ठ हुन् भने कथा तथा पटकथा ध्रुव लम्सालको रहेको छ, उनले १० वर्षपछि लेखनमा पुनरागमन गरेका छन् । फिल्मले सुमधुर प्रेमकथाको माध्यमबाट सामाजिक भावना र परिवेशलाई उजागर गर्ने लेखक लम्सालको दाबी छ । सुदिप बरालको छायांकन रहेको फिल्मलाई रीच इन्टरटेन्मेन्ट, एप्पल इन्टरटेन्मेन्ट र एफडी कम्पनीले वितरणको जिम्मा लिएको छ ।
गत चैत २८ गते, २८ दिनको सेड्युलमा छायांकन सम्पन्न भएको यस फिल्मको यतिबेला ‘पोस्ट प्रोडक्सन’ को काम तीव्र रूपमा भइरहेको छ । निर्माण पक्षले यसअघि नै फिल्मका दुई रोमान्टिक र भावुक पोस्टरहरू सार्वजनिक गरिसकेको छ, जसले दर्शकमाझ राम्रो कौतूहलता जगाएको छ । चाडपर्वको माहोल, बलियो स्टारकास्ट र रेखा थापाको निर्देशन रहेको हुँदा ‘माया भनेकै यस्तो होला’ बक्स अफिसमा प्रतीक्षित फिल्म बनेको छ ।
Discussion about this post