फिल्म ‘रोल नं १’ को टाइटल गीत गाएरै ‘प्लेब्याक सिंगर’ बन्ने अवसर

इटहरी/ नेपाली फिल्म क्षेत्रमा नयाँ अनुहार र प्रतिभाको खोजी भइरहेको समयमा, सेभेन सिज सिनेमाले सांगीतिक क्षेत्रमा भविष्य खोजिरहेकाहरूका लागि एक उत्कृष्ट अफर लिएर आएको छ । अब दर्शक वा कुनै पनि नवोदित गायक–गायिकाले सिधै ठूलो पर्दामा आफ्नो आवाज गुञ्जाउन पाउने भएका छन् । निर्माण टिमले आफ्नो आगामी फिल्म ‘रोल नं १’ को टाइटल गीतका लागि सामाजिक सञ्जालमार्फत खुला गायन प्रतिस्पर्धाको घोषणा गरेको हो ।

यस प्रतिस्पर्धामा उमेरको कुनै पनि हदबन्दी राखिएको छैन । प्रतिभा भएका जो कोहीले पनि एक्लै वा समूहमा रहेर भिडियो बनाउन सक्नेछन् । सहभागीले सेभेन सिज सिनेमाको आधिकारिक युट्युब च्यानलमा सार्वजनिक भएको रोल नं १ को टाइटल गीत लाई आफ्नै स्वरमा गाउनुपर्नेछ । गीत गाउँदा आफ्नो छुट्टै मौलिक शैली थप्न पाइने स्वतन्त्रता निर्माण पक्षले दिएको छ । तर, गीतको मूल धुन भने प्रस्ट रूपमा चिनिने हुनुपर्नेछ ।

प्रतिस्पर्धामा सामेल हुनका लागि भिडियो प्राविधिक रूपमा पनि उत्कृष्ट हुनुपर्नेछ । भिडियो अनिवार्य रूपमा ठाडो आकार अर्थात् मोबाइल स्क्रिनमा पूर्ण रूपमा देखिने गरी खिचिएको हुनुपर्नेछ । भिडियोको लम्बाइ २ देखि ३ मिनेटसम्मको हुनुपर्छ भने स्पष्ट आवाज र आकर्षक प्रस्तुतिलाई विशेष प्राथमिकता दिइनेछ । आफूले तयार पारेको उक्त भिडियोलाई इन्स्टाग्राम, टिकटक वा फेसबुकमा अपलोड गरेर प्रतिस्पर्धामा सहभागी हुन सकिनेछ ।

भिडियो पोस्ट गर्दा निर्माण कम्पनीलाई मेन्सन गर्दै @7SeasCinema लाई ट्याग गर्नुपर्नेछ । यस्तै क्याप्सनमा #RollNo1, #हरेकविधार्थीकोकथा, #Jestha15, र #RollNo1TitleSong अनिवार्य रुपमा लेख्नु पर्नेछ । विजेताको छनोट पारदर्शी रूपमा गर्नका लागि निर्माण टिमले स्पष्ट मापदण्ड तय गरेको छ । जसमा ५०% अङ्क फिल्मका संगीत निर्देशकबाट स्वरको मूल्याङ्कन गरिनेछ भने ३०% अङ्क भिडियो र प्रस्तुतिमा रहेको सिर्जनात्मकता हेरिनेछ ।

@parikalanewsofficial

यस्तै २०% अङ्क सामाजिक सञ्जालमा भिडियोले पाएको दर्शकको प्रतिक्रिया र इन्गेजमेन्टको आधारमा तय गरिनेछ । यस प्रतिस्पर्धाका विजेताले सिधै फिल्म ‘रोल नं १’ को टाइटल गीत गाउने अवसर प्राप्त गर्नेछन् । साथै, व्यावसायिक स्टुडियोमा गीत रेकर्ड गर्ने र फिल्मको पर्दामा आफ्नो नाम हेर्ने सपनासमेत पूरा हुनेछ । यस प्रतिस्पर्धाको अन्तिम नतिजा आगामी जेठ ०१ गते सार्वजनिक गरिनेछ । निर्माण पक्षका अनुसार, तोकिएका नियमहरूको पूर्ण रूपमा पालना नगर्ने प्रतिस्पर्धीलाई छनोट प्रक्रियामै समावेश गरिने छैन । त्यसैले, नियमहरूलाई ध्यानमा राखेर आजै भिडियो तयार गर्न आह्वान गरिएको छ ।