इटहरी/नेपालका सहकारी पीडितहरूको कथालाई पर्दामा उतार्ने प्रयासस्वरूप निर्माण गरिएको नेपाली फिल्म ‘महाभोज’ को विशेष प्रिभ्यु मङ्गलवार साँझ काठमाडौंमा सम्पन्न भयो। सार्वजनिक प्रदर्शन सुरु हुनुभन्दा एक दिनअगाडि गरिएको यस शोमा पत्रकार, फिल्म युनिट र सहकारी पीडितहरूमध्येबाट छानिएका ६० जना प्रतिनिधिहरूको उपस्थिति थियो।
फिल्म हेर्दा हलमा विशेष गरी सहकारी घोटालाबाट प्रभावित दर्शकहरू बीच एक गहिरो भावनात्मक जुडाव देखिन्थ्यो। पर्दामा देखाइएका घटनाले उनीहरूको वास्तविक संघर्षलाई छुन पुग्यो र न्यायका लागि लड्न थप हिम्मत दियो भन्ने उनीहरूको अनुभव थियो। प्रदर्शन सकिएपछि उनीहरूले “राज्यले नसुनेको हाम्रो आवाज ‘महाभोज’ले पर्दाबाट बोलेको छ” भन्दै भावुक नाराबाजी गरे।
निर्देशक दिनेश राउत, निर्माता हिमाल कडरिया, लेखक विकास सुवेदी र सम्पूर्ण कलाकारप्रति उनीहरूले आभार व्यक्त गर्दै भने, यो फिल्म सबै नेपालीले अवश्य हेर्नुपर्ने विषयवस्तु बोकेको छ। मनोरञ्जनभन्दा माथि उठेर, यो फिल्म आवाजविहीनहरूको आवाज बन्न सफल भएको छ। पत्रकारहरूले पनि फिल्मको कथावस्तु र प्रस्तुतीकरणप्रति सकारात्मक प्रतिक्रिया जनाए। सामाजिक यथार्थलाई सजीव र प्रभावकारी ढंगले प्रस्तुत गरेको भन्दै निर्देशकको निर्देशन शैलीको प्रशंसा गरेका छन्। ‘महाभोज’ लाई केवल मनोरञ्जन फिल्म नभई एक सामाजिक दस्तावेजका रूपमा समेत मूल्यांकन गरिएको छ।
देशभरका प्रमुख मल्टिप्लेक्स र सिंगल स्क्रिन हलहरूले फिल्मको अग्रिम बुकिङ खुला गरिसकेका छन्। वितरकका अनुसार करिब २०० शो मार्फत नेपालभर यसको प्रदर्शन हुने छ।दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल र मोहन निरौला जस्ता कलाकारहरूको अभिनय रहेको यो फिल्मले सहकारी संस्थामा भएको आर्थिक क्षतिले पारेको प्रभाव, जागिरेहरूको मानसिक तनाव र राजनीतिक प्रभावकारितालाई छरितो र गहिरो तरिकाले उजागर गरेको छ। हास्यरसले भरिएका केही दृश्यहरूले फिल्मलाई अझ रमाइलो र पहुँचयोग्य बनाएको छ।क्लक वर्क क्रियशन र पिक्चर फ्रेमको संयुक्त प्रस्तुति रहेको यो फिल्म नेपालसँगै केही विदेशमा पनि एकैसाथ प्रदर्शन हुने योजना बनिरहेको छ।देशभर प्रदर्शन हुँदै गर्दा ‘महाभोज’ले राम्रो सन्देश फैलाउने आशा गरिएको छ।
@parikalanewsofficial
Discussion about this post