‘द ब्ल्यू लाइट’ मा अर्पण थापाको प्रवेश

इटहरी/ नेपाली फिल्म क्षेत्रले अर्को मनोवैज्ञानिक रहस्य बोकेको फिल्म पाउन लागेको छ सो फिल्मको नाम हो, ‘द ब्ल्यू लाइट’। केही दिनअघि मात्र थिम पोस्टरसँगै निर्माणको औपचारिक घोषणा भएको यो फिल्ममा अब चर्चित अभिनेता अर्पण थापा को नाम मुख्य भूमिकामा पुष्टि भएको छ।फिल्मका निर्देशक बलिराम चौहान हुनेछन्, जो यसअघिसम्म बहुप्रशंसित फिल्म ‘बलिदान’ को लेखक तथा सहायक निर्देशकको रूपमा परिचित छन्। निर्देशकको रूपमा चौहानको यो पहिलो प्रयास हो, जसलाई नेपाली फिल्म उद्योगले उत्सुकतापूर्वक हेरेको छ।

‘द ब्ल्यू लाइट’ एक साइकोलजिकल थ्रिलर फिल्म हो, जसको कथावस्तु रहस्यमय र मनोवैज्ञानिक तनावमा आधारित हुने बताइएको छ। फिल्म निर्माण टिमका अनुसार अर्पण थापा लाई एक प्रमुख पात्रका रूपमा हालै औपचारिकरूपमा अनुबन्ध गरिएको हो।फिल्म स्काइफल पिक्चर्सको प्रस्तुति रहनेछ भने रमन ग्रे, निर्माता भूमिकामा रहनेछन्। सिनेम्याटोग्राफीको जिम्मेवारी नरेन्द्र मैनालीले सम्हाल्नेछन्, जसले जेठ २१ (जुनको पहिलो हप्ता) बाट छायांकन सुरु गर्ने तयारी छ।

हालै सार्वजनिक गरिएको थिम पोस्टरमा अँध्यारो निलो रङको वातावरणमा उभिएकी एक बालिकाको चित्र देखिन्छ, जहाँ उसको अनुहार स्पष्ट नदेखाइ केवल कपाल, मुद्राले दर्शकमा रहस्य जगाउने शैली अपनाइएको छ। पोस्टरले सम्पूर्ण कथा भने खुलाएको छैन, जसले दर्शकको कौतूहल अझै बढाएको छ। निर्देशक चौहानले हाललाई फिल्मको प्लट र पूरै कलाकार टोली गोप्य राखिएको जानकारी दिएका छन्। तर, चाँडै अन्य कलाकारहरूको नाम र कथाको झलक सार्वजनिक गरिने जानकारी पनि दिएका छन्।निर्माणपक्षले फिल्म सन् २०२५ भित्रै प्रदर्शन गर्ने लक्ष्य लिएको छ, जसले नेपाली फिल्म उद्योगमा नयाँ स्वादको सिनेम्याटिक अनुभव ल्याउने अपेक्षा गरिएको छ।

@parikalanewsofficial