इटहरी/ फेसन उद्योगलाई नयाँ उचाइमा पुर्याउने लक्ष्यका साथ आयोजना भएको ‘ग्ल्याम नेपाल इन्टरनेशनल २०२५’ को लागि ३० मोडल छनोट भएका छन् । शनिबार काठमाडौको होटल हिमालयनमा सम्पन्न अडिसनमा ६ पुरुष र २५ महिला गरी ३० जना मोडलहरूको छनोट गरिएको हो । प्रारम्भ प्रोडक्सनका संस्थापक निर्देशक पवन आचार्यका अनुसार छनोट भएका मोडलहरूको नामावली केही दिनपछि सार्वजनिक गरिनेछ ।
छनोट प्रक्रियामा निर्णायक मण्डलीका रूपमा हेल्दी च्वाइस एस्थेटिक्स अस्पतालका सिइयो डा. उदीप श्रेष्ठ, प्लाजा समूहका अध्यक्ष युवराज श्रेष्ठ, केक्षुस्कालोजीका संस्थापक सुस्मा कार्की, कासाका संस्थापक रमिला नेमकुम र ग्ल्याम नेपाल इन्टरनेशनलका संस्थापक दीपक ज्ञवाली रहेका थिए ।
आगामी १५ डिसेम्बरमा होटल याक एण्ड यतिमा आयोजना हुने यो फेसन शोको विशेष आकर्षणका रूपमा बलिउडकी चर्चित अभिनेत्री उर्वशी रौटेलाको सहभागिता रहनेछ । शोमा सहभागी मोडलहरूका लागि महिलाको हाइट मापदण्ड ४.५ फिट र पुरुषको ४.१० फिट तोकिएको थियो ।
फेसनप्रेमीहरूलाई नवीन पहिरनको झलक दिने उद्देश्यले आयोजना हुने यो शोमा नेपालका चर्चित डिजाइनरहरूले तयार पारेका आकर्षक पहिरनहरू विभिन्न सिक्वेन्समा प्रस्तुत गरिनेछन् । शोका उत्कृष्ट मोडल तथा डिजाइनरहरूलाई अष्ट्रेलियामा हुने ग्ल्याम इन्टरनेशनलमा सहभागिता गर्न अवसर प्रदान गरिनेछ । जसले नेपाली फेसन उद्योगलाई अन्तर्राष्ट्रिय स्तरमा पुर्याउने अपेक्षा गरिएको छ ।
Discussion about this post