इटहरी/ सन्तोषी कार्कीले ४७ औं मिसेस युनिभर्सको ग्रान्ड फिनालेमा ‘मिसेस युनिभर्स करिज्मा’ सब टाईटल हाँसिल गरेकी छिन्। गत सातामात्र मिसेस नेपाल युनिभर्स २०२४ को उपाधि चुमेकी सन्तोषीले अघिल्लो शुक्रबारदेखि दक्षिण कोरियाको सियोलमा सुरु भएको ४७ औं मिसेस युनिभर्समा भाग लिएकी थिइन्, जहाँ विश्वका १४० देशका महिलाहरु सहभागी थिए।
हिजो बिहिवार सम्पन्न फिनालेमा सन्तोषीले यो महत्वपूर्ण उपाधि जितेकी हुन्। उनले आफ्नो सफलतालाई अर्को ठूलो उपलब्धिको रुपमा लिएको बताएकी छिन्। बेलायतमा बस्दै आएकी सन्तोषी फिनाले सकिएपछि सोही रात बेलायत फर्किएकी थिइन्। लन्डन फेशन हाउसको आन्तरिक प्रतिस्पर्धामा मिसेस नेपाल युनिभर्स २०२४ को ताज जितेपछि सन्तोषी मिसेस युनिभर्समा नेपालको प्रतिनिधित्व गर्न गएकी थिइन्।
“यसपटकको मिसेस युनिभर्समा मैले नेपाललाई चिनाउने र एउटा सब टाईटल पनि जित्ने अवसर पाएँ। कार्यक्रममा धेरै कुरा सिक्ने मौका मिल्यो,” उनले भनिन्। सन्तोषी अन्तर्राष्ट्रिय युवा उद्यमी महासंघ बेलायतकी महासचिव पनि हुन्, विभिन्न संस्थाहरुको नेतृत्वमा सक्रिय रहँदै आएकी उनी ८ वर्षको छोराकी आमा हुन्। उनले लन्डनको एक विश्वविद्यालयमा प्राध्यापन गर्नुका साथै लन्डनमै रेस्टुरेन्ट व्यवसाय पनि सञ्चालन गरिरहेकी छिन् ।
Discussion about this post