इटहरी/ युवा ज्योतिष तथा अभिनेता हरिहर अधिकारी र अभिनेत्री नीता ढुङ्गानाको प्रमुख अभिनय रहेको नेपाली फिल्म ‘ह्रस्व दीर्घ’को टिजर बिहीबार फूलपातीको अवसर पारेर सार्वजनिक गरिएको छ । सार्वजनिक टिजरमा अभिनेत्री रेखा थापा र विपना थापालाई विशेष रुपमा फिचर्ड गरिएको छ । साथै, गरिमा शर्मा र दक्षिण भारतीय कलाकारहरू ब्रह्मानन्दम, अली, सुनिल वर्मा, प्रदीप रावत, कबीर दुहन सिंहलाई पनि विशेष रुपमा प्रस्तुत गरिएको छ ।
यो फिल्मको कथा हरिहर अधिकारीले लेखेका हुन् भने पटकथा र संवाद प्रतीक पौडेल, चन्द्र पन्त र हरिहर अधिकारीले तयार गरेका छन् । फिल्मको छायाङ्कन बलिउडका चर्चित सिनेमाटोग्राफर कबिरलालले गरेका छन्, जसले यसअघि ‘वेलकम ब्याक’, ‘परदेश’, ‘दिल आपके पास है’ जस्ता फिल्महरूमा आफ्नो सिमेमाटोग्राफी कला प्रस्तुत गरेका छन् । हेर्नुस् टिजर ।
नेपाली, तेलुगु र हिन्दी भाषामा निर्माण गरिएको ‘ह्रस्व दीर्घ’ कार्तिक ३० गतेदेखि प्रदर्शनमा आउने छ । ‘ह्रस्व दीर्घ’ चन्द्र पन्तको निर्देशनमा तयार भएको फिल्म हो । यो फिल्म नीता फिल्मस् ब्यानरको प्रस्तुति हो भने जसको कार्यकारी निर्माता धनञ्जय गलानी हुन् । फिल्ममा अभिनेत्री सञ्चिता लुइँटेल, सरोज खनाल, किरण केसी, बुद्धि तामाङ, रवीन्द्र झा, नरेन खड्का र आदर्श मिश्रको पनि महत्त्वपूर्ण भूमिका रहेको छ । टिजरले एउटै नक्षत्र र भाग्य भएका प्रेम जोडीको उतारचढावपूर्ण कथालाई उजागर गर्ने प्रयास गरेको छ ।
Discussion about this post