दिव्या र विभाले जिते ‘मिस एण्ड मिसेज हेरिटेज इन्टरनेशनल नेपाल’को उपाधि

इटहरी/ ‘मिस एण्ड मिसेज हेरिटेज इन्टरनेशनल नेपाल २०२४’ को विजेताहरू घोषणा गरिएका छन् । दिव्या पात्राले ‘मिस हेरिटेज इन्टरनेशनल नेपाल २०२४’ को उपाधि जितेकी छन् भने विभा बस्नेतले ‘मिसेज हेरिटेज इन्टरनेशनल नेपाल २०२४’ को ताज पहिरिएकी छिन् । यस्तै प्रतियोगितामा रोशनी महर्जनले ‘मिसेस अर्थ एलिट नेपाल २०२४’ को उपाधि हात पारेकी छन् ।

दिव्या पात्राले आगामी नोभेम्बरमा थाइल्याण्डमा आयोजना हुने ‘मिस हेरिटेज इन्टरनेशनल २०२४’ मा नेपाललाई प्रतिनिधित्व गर्नेछिन् भने विभा बस्नेत पनि सोही प्रतियोगितामा प्रतिस्पर्धा गर्नेछिन् । रोशनी महर्जनले भने फिलिपिन्समा आयोजना हुने ‘मिसेस अर्थ एलिट २०२४’ मा नेपालको प्रतिनिधित्व गर्नेछिन् । सानेपाको हेरिटेज गार्डनमा बुधबार साँझ सम्पन्न प्रतियोगितामा ‘मिस’ तर्फ जसु महर्जन पहिलो रनरअप घोषित भइन् भने प्रत्युषा नेपाली दोस्रो रनरअप बनिन् ।

प्रतियोगितामा विभिन्न विधागत उपाधिहरू पनि प्रदान गरियो । जसअनुसार जसु महर्जन ‘मोष्ट ट्यालेन्ट’, रोशनी महर्जन ‘मोष्ट फ्रेण्ड्ली’, सान्ड्रिया राई ‘मोष्ट डिसिप्लिन’, दिव्या पात्रा ‘बेस्ट वाक’, विभा बस्नेत ‘बेस्ट परफर्मर’, लिली राई ‘बेस्ट स्माइल’, सितल बल ‘चार्मिङ पर्सनालिटी’, प्रत्युषा नेपाली ‘बेस्ट स्क्रिन’, रिभिमा बिसुंके ‘बेस्ट हेयर’ र गंगा पुरी ‘मोष्ट इन्सपाइरिङ’ घोषित भए ।

प्रतियोगितामा प्रमुख अतिथि अजय पीडी खनाल रहेका थिए । यस्तै निर्णायक मण्डलमा कलाकार लुनिमा तुलाधर, ‘मिस युनिभर्स नेपाल २०२२’ सोफिया भुजेल, आइएसओ लेखा परिक्षक दिवास योन्जान र मेकअप आर्टिस्ट क्याथरिन दाहाल रहेका थिए । प्रतियोगिताको कोरियोग्राफी अनिला श्रेष्ठले गरेकी थिइन् । ग्रीन आर्ट्स मिडिया प्रालिले आयोजना गरेको यो कार्यक्रम ‘हेरिटेज इन्टरनेशनल’का लागि नेपालका प्रतिनिधि छान्ने उद्देश्यले गरिएको थियो । आयोजक सीईओ प्रवीण लाकौलका अनुसार यो प्रतियोगिता विश्वभरका सम्पदा र संस्कृतिको संरक्षण र प्रवर्द्धनका लागि आयोजित गरिएको हो ।