राज र हेनाको अभिनयमा गायक कमल बिष्टको ‘नजरका इशारा’ सार्वजनिक

इटहरी/ गायक कमल बिस्टको आवाजमा रहेको गजल गीत ‘नजरका इशारा’को भिडियो सार्वजनिक भएको छ । गीतको शब्द किरण रिजालले लेखेका छन् भने संगीत शशि विक्रम थापाको रहेको छ । गायक बिस्ट ‘भ्वाइस अफ नेपाल’ सिजन २ का प्रतिस्पर्धी हुन् । गीतले एक युवा र युवतीबीच अनपेक्षित रूपमा जन्मिएको प्रेम र त्यसले निम्त्याउने पीडालाई प्रस्तुत गरेको छ ।

भिडियोमा होटेलमा काम गर्ने युवकले त्यहाँ आएकी महिला ग्राहकलाई मन पराउँछ । तर गलतफहमीका कारण युवक मानसिक पीडामा पर्छ । राज पौडेल र हेना नगरकोटीले यस कथामा सशक्त अभिनय गरेका छन्, जसले भिडियोको भावनात्मक पक्षलाई अझ गहिरो बनाएको छ । हेर्नुस् भिडियो ।

नारायण मगरको निर्देशनमा बनेको यस भिडियोमा पौडेल र नगरकोटीले आफ्नो अभिनय कौशल प्रस्तुत गरेका छन् । पौडेलले एक दशकभन्दा बढी समयदेखि म्युजिक भिडियो, विज्ञापन र वेब सिरिजमा काम गरेका छन् भने नगरकोटीले पनि विभिन्न चलचित्र र म्युजिक भिडियोमा अभिनय गरेकी छन् । भिडियोका सिनेमेटोग्राफर ज्ञानेन्द्र शर्मा हुमागाईँ हुन् भने सम्पादन र रङ्ग संयोजन भीम विश्वकर्माले गरेका छन् ।