इटहरी/ छेतेन गुरुङ र सन्तोष सेनले संयुक्त रुपमा निर्देशन गरेको फिल्म ‘प्रेम गीत ३’ ओटिटी प्लेटफर्ममा सार्वजनिक गरिएको छ । २०७९ सालको दसैंमा नेपाल र भारतमा एकसाथ प्रदर्शन भएको यो फिल्म ‘प्रेम गीत ३’ नेपालकै अग्रणी ओटीटी प्लेटफर्म ‘सिनेमाघर एप’मा रिलिज भएको हो । नेपाली र हिन्दी भाषामा सार्वजनिक भएको यस फिल्मले नेपाल र भारतमा सफलताको नयाँ कीर्तिमान बनाएको थियो । यो लिंक क्लिक गरेर प्रेम गीत ३ हेर्न सकिनेछ ।
हालै मात्र ‘सिनेमाघर एप’मा सशुल्क हेर्न मिल्ने गरि सार्वजनिक गरिएको यस फिल्ममा प्रदीप खड्का, क्रिस्टिना गुरुङ, शिव श्रेष्ठ, मनिष राउत, अनुभव रेग्मी, सम्वृद्धि शाही ठकुरी, सुनिल थापा, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा र योगिशा खत्री जस्ता कलाकारहरूले अभिनय गरेका छन् । फिल्मको कथा खजाग राज्यका कान्छा राजकुमार प्रेम र उनकी प्रेमिका गीतको जीवनमा आधारित छ । ज्योतिषीय रूपमा राजा हुने भविष्यवाणी गरिएको प्रेम आफ्नो जीवनको सबैभन्दा कठिन चुनौतीसँग जुध्दै प्रेमको गहिराइलाई सम्हाल्ने प्रयासमा लागिपर्छन् ।
‘प्रेम गीत ३’ को रिलिजसँगै सिनेमाघर एपले नयाँ अपडेट पनि ल्याएको छ । अब मोबाइल, स्मार्ट टिभी मात्र नभई, ल्यापटप र डेस्कटपमा वेब ब्राउजरमार्फत पनि फिल्म हेर्न सकिने सुविधा उपलब्ध गराइएको छ । साथै, नेपाल र भारत दुवै देशका प्रयोगकर्ताहरूले फोनपे क्युआर कोडको माध्यमबाट सहज भुक्तानी गर्न सक्नेछन् । सिनेमाघरका सिइओ सागर खरेलले नेपाली भाषामा फिल्म हेर्न सकिने सुविधा र २४ घण्टे प्राविधिक सहयोग छिट्टै उपलब्ध गराउने जानकारी पनि दिएका छन् ।
Discussion about this post