इटहरी/ फिल्म ‘मिसिङ : केटी हराएको सूचना’को पहिलो गीत सार्वजनिक भएको छ । निर्माण पक्षले ‘हेर्दै जाउँ..’ बोलको गीत आइतबार म्युजिक नेपालको युट्युब च्यानलमार्फत रिलिज गरेको हो । यस गीतमा रोहित जोन क्षेत्री र शितुसित बस्नेतको आवाज रहेको छ भने शब्द तथा संगीत दीपेन्द्र गौचनले दिएका छन् । गीतले दुई पात्रको संयोगवश भेटिएको कथा प्रस्तुत गर्छ, जहाँ उनीहरूको जीवनको दिशा अनिश्चित रहेको देखाइएको छ ।
गीतको भावनामा जीवन नै प्रश्नहरूले भरिएको कथा प्रस्तुत गरिएको छ । जीवनको विभिन्न मोडहरू, मिलन र बिछोड, खुसी र दुःखजस्ता घटनाहरूले जिन्दगीलाई जटिल बनाउँछन् । गीतमा मुख्य पात्रहरूले जीवनलाई सपना वा यथार्थको भिन्नता नभनी एउटा यात्रा मान्छन् । सृष्टि श्रेष्ठ र नाजिर हुसेनको अभिनय रहेको भिडियो तराई क्षेत्रको रमणीय दृश्यहरूमै छायांकन गरिएको छ, जसले गीतको कथालाई थप जीवन्त बनाएको छ । हेर्नुस गीत
फिल्म ‘मिसिङ : केटी हराएको सूचना’ कात्तिक ३० गते प्रदर्शनमा आउने तयारीमा छ । यसअघि सार्वजनिक टिजरमा अभिनेता नाजिर र अभिनेत्री सृष्टिबीचको प्रेमलाई फोकस गरिएको थियो, जसलाई यस गीतले पनि विस्तार गरेको छ । फिल्म धोका र बदलाको कथामा आधारित रहेको संकेत गीतले दिएको छ । फिल्मको निर्देशन अनुभवी निर्देशक दीपेन्द्र गौचनले गरेका हुन् । उनले करिब ३२ वर्षअघि चर्चित डकु-ड्रामा ‘उजेली’ निर्देशन गरेका थिए । फिल्मको छायांकन अमर महर्जनले गरेका छन् भने यसमा नकिम उद्दिन कार्यकारी निर्माताका रूपमा आबद्ध छन् ।
Discussion about this post