‘झुम्का हरायो’मा दुर्गेशसंग प्रियंका र गरिमासंग पेमाको ठुम्का

इटहरी/ चर्चित गायक पशुपति शर्मा र गायिका शान्तिश्री परियारको स्वरमा सजिएको तीज गीत ‘झुम्का हरायो’ सार्वजनिक भएको छ । आइतबार काठमाडौमा आयोजित विशेष कार्यक्रमका बिच निर्माण कम्पनीले उक्त गीतको भिडियो वर्ल्ड प्रिमियर गरेको हो । गीतको शब्द र सङ्गीत दुर्गेश थापाले दिएका छन्, उक्त भिडियोको निर्देशन पनि दुर्गेश आफैँले गरेका छन् । भिडियोमा दुर्गेशलाई अभिनेत्री प्रियङ्का कार्कीको अपोजिटमा देख्न सकिन्छ ।

गम्भीर विष्टको कोरियोग्राफी रहेको भिडियोमा मोडल तथा तिब्बती गायक पेमा लामा र मोडल टर्न अभिनेत्री गरिमा शर्माले पनि उत्कृष्ट नृत्य प्रस्तुत गरेका छन् । गीतले युवक र युवतीको भिन्न भिन्न प्रकारको पीडा र वेदनालाई प्रस्तुत गरेको छ । दुर्गेश, प्रियङ्का, पेमा, र गरिमाले लोभलाग्दो नृत्य पस्केका छन्, जसले गीतको भावनालाई थप सजीव बनाएको छ । हेर्नुस् भिडियो ।

सार्वजनिक डान्सिङ नम्बरमा दुर्गेशले रमाइलो सङ्गीतको फ्युजन गराएका छन् । बौद्ध धर्ममा आस्थावान् तिब्बती गायक पेमा लामाले हिन्दु धर्मको विशेष पर्व तीजलाई समेटेर तयार गीतमा जोडिएको भन्दै प्रशंसा पाएका छन् । मोडल तथा गीतकार दुर्गेशले आफू रिल र रियल लाइफमा फरक रहेको भन्दै आफ्नो बारेमा गरिने गलत हल्लाको पछि नलाग्न भिडियो सार्वजनिक कार्यक्रममा आग्रह गरे ।

उनले आफू सधैँ सकारात्मकताको पक्षधर रहेको र विगतको परिचय बदलेर नयाँ प्रकारले गीतसङ्गीतमा क्रियाशील हुने बताए । आफ्नो हिट सिरिज ‘बीच्च बीच्चमा ७’ लाई सन्देशमूलक बनाएर तीजकै अवसरमा दर्शकमाझ ल्याउन लागेको उनले खुलाए । हाल सार्वजनिक गीतको भिडियो छायाङ्कन रुपेश थापाले गरेका हुन् भने सम्पादन मिलन विश्वकर्माले गरेका छन् । नाइडोल प्रोडक्सनको तर्फबाट छिरिङ लामाले भिडियोलाई निर्माण गरेकी हुन् ।