इटहरी/आगामी मंसिर १५ अर्थात् डिसेम्बर १ बाट प्रदर्शन हुने बलिउड अभिनेता रणवीर कपुरको मुख्य भुमिका रहेको सिनेमा ‘एनिमल’को ट्रेलर सार्वजनिक भएको छ । एक्सन प्याक्ड दृश्यले भरिपूर्ण ट्रेलरमा सिनेमाको कथाको पनि खुलासा गरिएको छ ।
यो सिनेमा बाबुछोराको सम्बन्ध र त्यसले ल्याउने सामाजिक असरको कथामा आधारित रहेको बुझ्न सकिन्छ । बाबुले छोरालाई बाल्यकालदेखि नै समय दिन नसक्दा छोरामा विकास हुने आपराधिक र हिंसात्मक संस्कार अनि परिवारमा विग्रह आउँदा तेस्रो व्याक्तिले गर्ने चलखेलमा सिनेमा केन्द्रित छ ।
‘कवीर सिंह’ फेम्ड निर्देशक सन्दीप रेड्डी बांगा निर्देशित सिनेमामा पनि हिंसा र प्रेमको मनोविज्ञानलाई चित्रण गरेका छन् । धेरैपछि सशक्त अभिनयमा देखिएका रणवीरको चरित्रमा बहुआयामिक देख्न सकिन्छ । अनिल कपुरलाई उनका पिता र रश्मिकालाई पत्नीको रुपमा र बबी देओल खलपात्रको भूमिकामा छन् ।
ट्रेलर डार्क भए पनि व्यावसायिकता पनि मिश्रण गरिएको छ ।ग्याङस्टर चरित्रमा देखिएका बबी देओलको इन्ट्री दमदार लाग्छ । टिसिरिजको व्यानरमा निर्माण भएको सिनेमा मंसिर १५ अर्थात् डिसेम्बर १ बाट भारतसहित विश्वभर प्रदर्शन हुनेछ ।
Discussion about this post