इटहरी/ भदौ २९ गते अर्थात राष्ट्रिय बाल दिवसको अवसर पारेर आज इटहरीमा संगीत साधना प्रतिष्ठानले बालबालिकाहरुको प्रत्यक्ष गायन प्रस्तुति कार्यक्रम सम्पन्न गरेको छ । प्रतिष्ठानकै सभा हलमा ३ बजेदेखि आयोजना गरिएको उक्त कार्यक्रममा आयोजकका तर्फबाट ८ जना बालबालिकाकाले गीत प्रस्तुत गरेका थिए भने कार्यक्रममा उपस्थित ३ जना बालबालिकाले आफ्नो गायन कला प्रस्तुत गरेका थिए । आयोजकका तर्फबाट काब्या कार्की, कुशुम कार्की, एरिष्का निरौला, उपलब्धि पोख्रेल, रोशिका धिताल, प्राप्ती पोख्रेल, सिम्ला धिमाल र प्रेक्षा ओझाले लाईभ बाजामा गीत प्रस्तुत गरेका थिए ।
दर्जनौं दर्शकको उपस्थितिमा लाइभ बाजामा यी साना-साना नानिहरुको निर्धक्कसाथ गायन प्रस्तुतिले नानिहरुको प्रतिभा उजागर गर्ने आफुहरुको उद्देश्य पूरा भएको प्रतिष्ठानका महासचिव राजु केसिले बताए । उक्त कार्यक्रम अनौपचारिक गरिएको थियो । कार्यक्रममा साना-साना नानिहरुसंगै वरिष्ठ लोक गायक बालकृष्ण कार्कीले आफ्ना पुराना लोकप्रिय गीतहरु प्रस्तुत गरेका थिए । कार्यक्रममा सभापति, प्रमुख अतिथि, अतिथि आसनग्रहण नगराई बालबालिकालाई नै प्रमुख प्राथमिकता दिइएको थियो ।
प्रस्तुतिका क्रममा बालबालिकाहरुले पुराना कालजयी गीतहरु ‘बनेको छ पहराले यो छाती मेरो’, ‘जहाँ छन् बुद्धका आँखा’, ‘आँखैमा राख्छु मेरो देश’, ‘चौबन्धीमा पटुकी बाध्या छैन भन्दैमा’, ‘डाँफे झै नाच्ने हिमाल झै हास्ने’, ‘नेपाली हामी’, ‘मायाँ लाग्छ आमाको’ ‘नेपाली गौरव गरौ’, ‘फुलको आँखामा फुलै संसार’ प्रस्तुत गरेका थिए । यता बाध्यवाधन तर्फ हार्मोनियममा राजु केसि, तवलामा मणि गुरुङ र अंकुर भट्टराई, बेस गिटारमा जेम्स श्रेष्ठ, रिदम गिटारमा प्रवेश राई, सारंगीमा भोलामान गुरुङ, जिम्बेमा सर्मिला सिग्देल, अक्टोप्याडमा खुबिन्द्र श्रेष्ठ, साउण्डमा टीका लिम्बु र विवस थापा मगर थिए । अक्टोप्याड बजाउने श्रेष्ठ इटहरीको फर्स्ट अकोस्टिक ड्रमर हुन् ।
Discussion about this post