इटहरी/ भोलि अर्थात् फागुन १ गतेबाट प्रदर्शनको तयारीमा रहेको फिल्म ‘श्री बुकुरोः द होम कलिङ’ ले प्रिमियर शोमै अग्रज फिल्मकर्मीहरूको मन जितेको छ । बुधबार सिटी सेन्टरस्थित बिग मुभिजमा आयोजित भव्य प्रिमियरमा सहभागी अतिथिहरूले फिल्मलाई पर्दामा कोरिएको एक जीवन्त ‘चित्र’ को संज्ञा दिएका छन् । प्रिमियरमा उपस्थित बरिष्ठ निर्देशक तुलसी घिमिरेले फिल्म हेरेपछि भावुक हुँदै यसलाई पाखण्डीपन भन्दा पनि एउटा सुन्दर ‘पेन्टिङ’ अर्थात् चित्र जस्तो बनेको प्रतिक्रिया दिए ।
उनले भने, “फिल्म हेरिरहँदा मलाई मेरो पुरानो घरमा पुर्यायो । लक्ष्मी गिरीजीको अभिनय हेर्दा मैले मेरी आमालाई सम्झेँ । यो फिल्मले ‘बुकुरो’ शब्दमार्फत पैतृक घरको महत्त्वलाई गज्जबले अर्थ्याएको छ ।” निर्देशक घिमिरेले फिल्ममा समेटिएका स–साना मानवीय संवेदना, जस्तै-बाल्यकालमा खोलामा खेल्ने फुपू–भदैको बुढेसकालको भेट र लोभी मामाको चरित्रले कथालाई निकै वास्तविक र मन छुने बनाएको बताए ।
साथै, आमालाई गाली गर्ने र थप्पड लाउने तीनैजना छोराहरूको भूमिकालाई पनि उनले प्रशंसा गरे । अर्का अतिथि अभिनेता तथा निर्देशक जयकिशन बस्नेतले ‘श्री बुकुरो’ हेर्दा कुनै उपन्यास पढिरहेजस्तो भान भएको बताए । उनले भने, “यसमा कमेडी र पारिवारिक सम्बन्धको समिश्रण उत्कृष्ट छ । लक्ष्मी दिदीले यमराजसँग गरेको कुरा र मुक्तिनाथ यात्राको दृश्य निकै रमाइलो लाग्यो ।” उनले वर्षौंपछि हुने दिदीभाइको भेट र समाजमा आफ्नै मान्छेले दिने छुरा हान्ने प्रवृत्तिलाई फिल्मले यथार्थपरक ढङ्गले चित्रण गरेको उल्लेख गरे ।
@parikalanewsofficial
निर्माता तथा वितरक छविराज ओझाले पनि फिल्म उत्कृष्ट बनेको भन्दै निर्माण टिमलाई बधाई दिए । सुदीप भुपाल सिंहको लेखन तथा निर्देशनमा बनेको यो फिल्मले घर, परिवार र समाजको कथा भन्छ । विशेषगरी पुरानो थाकथलो लाई जोगाउनुपर्ने सन्देश बोकेको फिल्ममा प्रेम जीवनमा चिना नमिल्दा आउने अड्चन र पारिवारिक सम्बन्धको आरोह-अवरोह समेटिएको छ ।
फिल्मको मुख्य भूमिकामा वरिष्ठ अभिनेत्री लक्ष्मी गिरी छिन् । उनीसँगै आशीर्वाद बी क्षेत्री, निकिता आचार्य, रोशनी कार्की, उत्तम न्यौपाने, रामबाबु रेग्मी, राजन इशान, दीपिका थापा, लय संग्रौला, मोहन निरौला लगायतका कलाकारहरूको अभिनय रहेको छ । रुबी सेन सिंहको लगानी रहेको यस फिल्मलाई सञ्जय लामा र राजेश श्रेष्ठले छायांकन गरेका हुन् । कथाको माग अनुसार फिल्म मुस्ताङ, बाग्लुङ, कास्की, दमौली, मकवानपुर र काठमाडौँका रमणीय स्थानहरूमा छायांकन गरिएको छ ।
Discussion about this post