‘झिँगेदाउ २’ को ६३ दिने सुटिङ यात्रा पूरा: अर्को वर्षको दशैंमा बक्स अफिस तताउने तयारी

इटहरी/ बहुप्रतिक्षित नेपाली फिल्म ‘झिँगेदाउ २’ को छायांकन औपचारिक रूपमा सकिएको छ । निर्देशक ज्ञानेन्द्र देउजाको निर्देशनमा निर्माण भइरहेको यो फिल्मको ६३ दिन लामो सुटिङ सेड्युल बुधबार चितवनमा अन्तिम दृश्य खिचेसँगै पूरा भएको हो । निर्माण टिमले ६० दिनको कार्यतालिका बनाएर गत मंसिरमा छायांकन सुरु गरेको थियो । यद्यपि, फिल्मलाई थप उत्कृष्ट बनाउन निर्धारित समयभन्दा तीन दिन बढी समय खर्चिएको छ ।

निर्देशक देउजाका अनुसार, “पहिलो भागले पाएको अपार सफलतालाई कायम राख्न र दोस्रो भागलाई त्योभन्दा पनि माथिल्लो स्तरको बनाउन हामीले कुनै कसर बाँकी राखेका छैनौं । दर्शकले एउटा पूर्ण र स्तरीय फिल्म हेर्न पाउनेमा म विश्वस्त छु।”

काभ्रेको पनौतीबाट शुभसाइत गर्दै सुरु भएको यो फिल्मको छायांकन टोलीले देशका विभिन्न रमणीय स्थानहरूमा पुगेर दृश्यहरू कैद गरेको छ । निर्माण टिमले काठमाडौं, भक्तपुर, साँखु, तनहुँ, बन्दीपुर, देवघाट, दोलखा, चित्लाङ र पालुङ हुँदै चितवन पुगेर छायांकन सम्पन्न गरेको हो । कपनगढी सिनेमा प्रा.लि. र फिल्म क्रिउ नेपालको संयुक्त ब्यानरमा निर्माण भएको यस फिल्ममा नेपाली फिल्म क्षेत्रका चर्चित कलाकारहरूको अभिनय देख्न पाइनेछ ।

@parikalanewsofficial

सरोज खनाल, आर्यन सिग्देल, महेश त्रिपाठी, केकी अधिकारी, आँचल शर्मा र कुशल बिष्ट फिल्मका प्रमुख भूमिकामा छन भने बसुन्धरा भुषाल, चैत्यदेवी सिंह, हिँउवाला गौतम, विजय देउजा, आशा भुषाल, अभय राज बराल, आशिष पुरुष लगायतको पनि अभिनय रहेको छ । फिल्मको कथा स्वयं निर्देशक ज्ञानेन्द्र देउजाले लेखेका हुन् भने पटकथामा उनलाई परिच्छेद सेन, गोविन्द फुयाल र शिशिर चालिसेले सघाएका छन् ।

अबको केही दिनमै फिल्मको पोस्ट-प्रोडक्सन सुरु हुनेछ । फिल्मको निर्मातामा सुलभ प्रतिक देउजा र समीक्षा देउजा रहेका छन् । संगीत, अर्जुन पोखरेल, छायांकन बिष्णु घिमिरे ‘कल्पित’, द्वन्द्व रोशन श्रेष्ठ, कोरियोग्राफी रामजी लामिछाने, सम्पादन मित्र डि गुरुङ र कला निर्देशनमा पासाङ टि शेर्पा र मानिक पाख्रिन रहेका छन् । यो फिल्म अर्को वर्षको दशैंमा दर्शकमाझ रिलिज हुने पक्का गरिएको छ ।