निखिल र जसितापछि ‘पारस’ मा प्रियंकाको इन्ट्री, कसको जोडी बन्लान् निखिल ?

इटहरी/ निर्देशक कृषा चौलागाईंको निर्देशनमा बन्न लागेको फिल्म ‘पारस’ मा स्टार कलाकारहरूको जमघट बाक्लिँदै गएको छ । लिड रोलमा अभिनेता निखिल उप्रेती र अभिनेत्री जसिता गुरुङ फाइनल भइसकेको अवस्थामा अब टिममा अभिनेत्री प्रियंका कार्कीको पनि प्रवेश भएको छ ।

निर्माण पक्षले बुधबार प्रियंकालाई औपचारिक रूपमा फिल्ममा अनुबन्ध गरेको हो । यो खबरलाई प्रियंका स्वयंले पनि सामाजिक सञ्जालमार्फत पुष्टि गरेकी छन् । फिल्ममा एकपछि अर्को चर्चित अभिनेत्रीको प्रवेशले दर्शकमाझ रोचक प्रश्न खडा गरेको छ- आखिर निखिल उप्रेतीको जोडी को बन्नेछिन् ? यसअघि जसिताको प्रवेश हुँदा उनैलाई निखिलको अपोजिटमा देखिने अनुमान गरिएको थियो ।

तर, अब प्रियंका पनि थपिएपछि फिल्ममा त्रिकोणात्मक प्रेम कथा हो वा अन्य कुनै रोचक ट्विस्ट छ भन्ने विषयमा निर्माण पक्षले कौतूहल कायमै राखेको छ । केपी फिल्म्सको ब्यानरमा निर्माण हुने यो फिल्म एक्सन र सामाजिक कथावस्तुमा आधारित रहनेछ ।

@parikalanewsofficial

‘पिताम्बर’ र ‘एैंचोपैंचो’ पछि निर्देशक कृषाको यो तेस्रो फिल्म हो । भारतीय लेखक सचिन लादियाको पटकथा रहेको फिल्ममा पुरुषोत्तम प्रधानको छायांकन रहनेछ । निर्माण टिमका अनुसार फिल्मको छायांकन निकट भविष्यमै सुरु हुँदैछ र बाँकी कलाकारहरूको जानकारी पनि क्रमशः सार्वजनिक गरिनेछ ।