इटहरी/ महाशिवरात्रिको अवसर पारेर आगामी फागुन १ गतेदेखि प्रदर्शनमा आउन लागेको नेपाली फिल्म ‘श्री बुकुरो : द होम कलिङ’ को ट्रेलरले यतिबेला सामाजिक सञ्जालमा सकारात्मक प्रतिक्रिया बटुलिरहेको छ । सार्वजनिक भएको छोटो समयमै यसको ट्रेलरले दर्शकबाट अर्गानिक र मौलिक स्वादको अपेक्षासहित सकारात्मक प्रतिक्रिया सिर्जना गरेको हो । विशेषगरी युट्युब र अन्य सामाजिक प्लाटफर्महरूमा दर्शकहरूले ग्रामीण परिवेशको कथा र पारिवारिक संवेदनालाई निकै रुचाएको प्रतिक्रिया दिइरहेका छन् ।
करिब ३ मिनेट ३३ सेकेन्ड लामो यो ट्रेलरको प्रस्तुति परम्परागतभन्दा केही फरक र कलात्मक छ । पोएटिक न्यारेसन शैलीमा अघि बढ्ने ट्रेलरले दर्शकलाई पात्रहरूको मनोदशासँगै यात्रा गराउँछ । फिल्मकी मुख्य पात्र एवं वरिष्ठ अभिनेत्री लक्ष्मी गिरीलाई केन्द्रमा राखेर बुनिएको ट्रेलरमा एउटा सानो ‘बुकुरो’ अर्थात् घर बनाउने सपना, सन्तानप्रतिको मोह, विवाह र त्यसपछि आउने पारिवारिक उतारचढावलाई मार्मिक ढंगले देखाइएको छ । धेरै दर्शकले ट्रेलर हेरेपछि “आफ्नै गाउँघर र आमाको याद आएको” भन्दै सामाजिक सञ्जालमा टिप्पणी गरेका छन् । हेर्नुस् ट्रेलर ।
‘माला’ र ‘रुद्रप्रिया’ जस्ता फिल्म निर्देशन गरिसकेका निर्देशक सुदीप भुपाल सिंह यसै फिल्ममार्फत ९ वर्षपछि निर्देशनमा फर्किएका छन् । पछिल्लो समय नेपाली बक्स अफिसमा सामाजिक र पारिवारिक कथावस्तु बोकेका फिल्मले राम्रो व्यापार गरिरहेको सन्दर्भमा, सिंहले ‘श्री बुकुरो’ मार्फत दर्शकको मन जित्ने विश्वास व्यक्त गरेका छन् । उनले यसलाई “विशुद्ध पारिवारिक र मनोरञ्जनात्मक प्याकेज” बताएका छन् । फिल्म रेञ्जको ब्यानरमा रुबी सेन सिंहले निर्माण गरेको यस फिल्ममा पुराना र नयाँ पुस्ताका कलाकारहरूको राम्रो मिश्रण छ ।
@parikalanewsofficial
फिल्ममा आशीर्वाद क्षेत्री, लक्ष्मी गिरी, निकिता आचार्य, प्रतिकराज आचार्य, रोशनी कार्की, राजन इशान, लय संग्रौला, मोहन निरौला, रश्मी भट्ट लगायतका कलाकारको अभिनय रहेको छ । मुस्ताङ, बाग्लुङ, कास्की, दमौली देखि काठमाडौँसम्मका रमणीय स्थानहरूमा छायांकन गरिएको यो फिल्मको भिजुअल पनि सामाजिक सञ्जालमा तारिफको विषय बनेको छ । रञ्जीत गजमेर, बसन्त सापकोटा र विक्रम कार्कीको संगीत तथा शिव परियार लगायतका गायकहरूको स्वर रहेको यस फिल्मले हलमा दर्शकलाई कतिको तान्न सक्छ, त्यो भने हेर्न बाँकी नै छ ।
Discussion about this post