फागुन २९ मा रिलिज हुने ‘लालिमा’ टिजरमा देखियो यौनकर्मीको मौन चित्कार

इटहरी/ समाजको अँध्यारो पाटो र संरचनागत अन्यायको कथा बोकेको फिल्म ‘लालिमा’ले आफ्नो प्रदर्शन मिति तय गर्दै प्रचारप्रसार आरम्भ गरेको छ । आगामी फागुन २९ गतेबाट देशभर प्रदर्शनमा आउने यो फिल्मको टिजर र फस्टलुक पोस्टर सार्वजनिक गरिएको छ । निर्माण पक्षले मंगलबार साँझ ओएसआर डिजिटल युट्युब च्यानलमार्फत फिल्मको टिजर सार्वजनिक गरेको हो । टिजरमा फिल्मकी शीर्ष पात्र रोशनी कार्कीलाई मात्र केन्द्रमा राखिएको छ ।

एउटा बन्द कोठाभित्र मानसिक छटपटी र पीडामा रहेकी रोशनीको अभिनयले दर्शकमा कौतुहलता र सस्पेन्स सिर्जना गरेको छ । टिजरसँगै सार्वजनिक गरिएको पोस्टरमा पनि रोशनीलाई नै एकल फिचर गरिएको छ । झ्यालको छेउमा संकटपूर्ण अवस्थामा बसिरहेकी, शरीरको माथिल्लो भाग सेतो कपडाले मात्र ढाकिएको र ओठमा लतपतिएको लालीले उनको चरित्रले भोगेको हिंसा र विवशतालाई सांकेतिक रूपमा प्रस्तुत गरेको छ । हेर्नुस् टिजर ।

लेखक तथा निर्देशक रोशन मिराजका अनुसार ‘लालिमा’ काल्पनिक कथा मात्र होइन । यो फिल्म करिब ३ हजार यौनकर्मीहरूको प्रत्यक्ष अनुभव र भोगाइमा आधारित रहेर निर्माण गरिएको हो । निर्देशक मिराज भन्छन्, ‘यो फिल्म केवल पीडाको कथा होइन, यो शोषण र अन्यायविरुद्ध नझुक्ने मानवीय साहसको दस्तावेज हो ।’ फिल्मको कथा आमा र छोरीको संघर्षमा केन्द्रित छ । लनायिका रोशनी कार्कीले ‘लालिमा’को भूमिका निर्वाह गरेकी छिन् भने उनकी बोल्न नसक्ने आमाको भूमिकामा चर्चित अभिनेत्री उषा रजक छिन् । कथाअनुसार, एउटा घटनाका कारण आमा कारागार पुग्छिन् ।

@parikalanewsofficial

आमालाई जेलमुक्त गराउने संघर्षका क्रममा लालिमा सहरको कठोर र अँध्यारो दलदलमा फस्दै जान्छिन् । जसका कारण उनले शारीरिक, भावनात्मक र मानसिक पीडा भोग्न बाध्य हुन्छिन् । फिल्ममा रोशनी कार्की र उषा रजकका अलावा शिशिर वाङ्देल, जीवन भट्टराई, सबिन कट्टेल, घनश्याम जोशी र सुष्मा निरौला लगायतका कलाकारहरूको मुख्य भूमिका रहेको छ । ‘फेथ आस्था’ र ‘एम्पिफाई चेन्ज’को सहकार्यमा निर्माण भएको यस फिल्मको कार्यकारी निर्माता रीना लामा हुन् । यो फिल्मले दर्शकलाई समाजको लुकेको पाटो देखाउने अपेक्षा गरिएको छ ।