निखिल र वर्षाको पहिलोपटक ‘अनस्क्रिन रोमान्स’, सुरु भयो ‘कस्तुरी’को छायांकन

इटहरी/ नेपाली फिल्म क्षेत्रका चर्चित एक्सन स्टार निखिल उप्रेती र लोकप्रिय अभिनेत्री वर्षा सिवाकोटी पहिलोपटक एकसाथ पर्दामा देखिने भएका छन् । दर्शकका लागि सरप्राइज प्याकेज बन्न सक्ने यो नयाँ जोडीको मुख्य भूमिका रहेको फिल्म ‘कस्तुरी’ को मंगलबार औपचारिक रूपमा शुभमुहूर्त सम्पन्न भएको छ ।

ललितपुरस्थित ऐतिहासिक बंगलामुखी मन्दिरमा पूजाआजा गर्दै फिल्मको छायांकन आरम्भ गरिएको निर्देशक ऋत बोहोराले जानकारी दिए । निर्देशक बोहोराका अनुसार, यो फिल्म केवल मनोरन्जन मात्र नभई रहस्य, सस्पेन्स र अपराधका गहिरो तहहरूलाई उजागर गर्ने पृथक कथावस्तुमा निर्माण हुँदैछ । फिल्मको धेरैजसो दृश्य काठमाडौं र यसका आसपासका क्षेत्रमा खिचिनेछ ।

निखिल र वर्षाको जोडीसँगै फिल्ममा अनुभवी र नयाँ कलाकारहरूको बाक्लो उपस्थिति रहनेछ । फिल्ममा शेखर चापागाईं, निर्मल शर्मा, नीशा अधिकारी, अर्जुन गुरुङ, भोलाराज सापकोटा, सबी थापा, प्रशान्त केसी, सन्तोष बानियाँ, सुवास बञ्जन, मिरा पण्डित, घनश्याम जोशी, श्रेया श्रेष्ठ, प्रतिष्ठा थापा र नेहा गौतमको अभिनय रहनेछ । साथै, गौरव पहारी र हेना नगरकोटी विशेष भूमिकामा देखिनेछन् ।

@parikalanewsofficial

टेन इन्टरटेनमेन्ट प्रा.लि.को ब्यानरमा बन्न लागेको यस फिल्मका निर्माता धिरज कुमार अग्रवाल हुन् भने सह–निर्मातामा अञ्जली चौधरी रहेकी छन् । निर्देशक बोहोराकै कथा रहेको ‘कस्तुरी’लाई आलोक शुक्लाले क्यामेरामा कैद गर्नेछन् । फिल्ममा संगीत प्रशान्त शिवाकोटीको रहनेछ भने प्रमुख सह–निर्देशकमा ललित बिष्ट र निर्माण व्यवस्थापनमा दिलीप पन्त रहेका छन् ।