धर्मको आवरणमा अपराधको खेलः ‘शिवांश’ भोलिबाट देशभरका हलमा

इटहरी/ के धर्मको रातो वस्त्रभित्र अपराध लुक्न सक्छ ? बाहिर जटाधारी ‘अघोरी’ देखिने पात्र भित्रभित्रै कस्तो खेल खेल्दैछ ? यही रहस्य र कौतुहलताको जवाफ लिएर फिल्म ‘शिवांश : च्याप्टर १’ भोलि अर्थात् फागुन १ गते शुक्रबारबाट दर्शकमाझ आउँदैछ । महाशिवरात्रिको छेको पारेर रिलिज हुन लागेको यो ‘स्पिरिचुअल एक्सन ड्रामा’ले धर्मको खोल ओडेर हुने अपराध र शक्ति सङ्घर्षको कथा भन्छ ।

फिल्मको कथा पूर्ण रूपमा काल्पनिक मात्र छैन, यसमा हिन्दु पौराणिक गाथा ‘समुद्र मन्थन’को रोचक प्रसंग पनि जोडिएको छ । मन्थनका क्रममा हराएको वा उछिट्टिएको एक शक्तिशाली ‘शिला’ अर्थात् ढुङ्गाको खोजी नै फिल्मको मुख्य द्वन्द्व हो । आध्यात्मिक शक्ति हत्याउने होडबाजीमा लाग्ने पात्रहरूको उतारचढावलाई निर्देशक सन्तोष कुमार आत्रेयले पर्दामा उतारेका छन् ।

फिल्ममा अभिनेता प्रवीण खतिवडा केन्द्रिय भूमिकामा छन् । उनी रहस्यमयी अघोरी पात्रको भूमिकामा देखिएका छन् । उनलाई साथ दिन तेज गिरी, विमला लिम्बू, रुषा न्यौपाने, विकास जोशी, प्रदीपकुमार चौधरी, उदय कुमार सुब्बा लगायतका कलाकारहरूको अभिनय रहेको छ । अञ्जन सिनेमा प्रोडक्सनको ब्यानरमा बनेको यस फिल्मको कथा अञ्जान केसीले लेखेका हुन् भने पटकथा बारत लिम्बूको रहेको छ ।

@parikalanewsofficial

कथावस्तु वजनदार र फरक भए पनि प्रदर्शकहरूले भने ‘शिवांश’लाई पत्याइसकेको देखिदैन । देशभरका मल्टिप्लेक्सहरूले सार्वजनिक गरेको शो तालिका अनुसार फिल्मले निकै न्यून शो पाएको छ । यो समाचार तयार पार्दासम्म देशभरबाट ‘शिवांश’ले करिब ९७ शो मात्र प्राप्त गरेको छ । देशकै ठूलो चेन क्यूएफएक्सले फिल्मलाई जम्मा १३ शो दिएको छ, जसमध्ये काठमाण्डौंमा ५ र काठमाण्डौ बाहिर ७ शो दिएको छ ।

यस्तै आईएनआई, वान सिनेमाज, बिग मुभिज र एफक्यूब लगायतका हलमा पनि बुकिङ खुला भइसकेको छ । निर्माण पक्षले भने फिल्म ‘शिवांश’को मेकिङ र कथावाचन शैलीले दर्शकलाई नयाँपन दिने र शो सङ्ख्या बढ्ने विश्वास व्यक्त गरेको छ ।