‘फ्रेन्च किस’मा सुपरस्टार रेखा थापाको ‘सरप्राइज इन्ट्री’: अर्पण र थिन्लेसँग जोडिइन् रेखा

इटहरी/ चितवनका विभिन्न स्थानमा छायांकन भइरहेको नयाँ पुस्ताको लभ स्टोरी बोल्ने फिल्म ‘फ्रेन्च किस’ मा नेपाली फिल्म क्षेत्रकी ‘सुपरस्टार’ अभिनेत्री रेखा थापाको धमाकेदार प्रवेश भएको छ । फिल्मको निर्माण पक्षले कथालाई थप शसक्त बनाउन अभिनेत्री थापालाई औपचारिक रूपमा अनुबन्ध गरेको हो । ए.टी.एफ. प्रोडक्सन प्रा.लि.को ब्यानरमा निर्माण भइरहेको यो फिल्मको ‘कास्टिङ’ अब निकै लोभलाग्दो बनेको छ ।

फिल्ममा यसअघि नै ‘शाम्बाला’ फेम्ड अभिनेत्री थिन्ले ल्हामो, दिग्गज अभिनेत्री गौरी मल्ल र अभिनेता तथा निर्देशक अर्पण थापा मुख्य भूमिकामा अनुबन्ध भइसकेका थिए । अब रेखा थापाको आगमनले फिल्ममा अनुभव र स्टारडमको विशेष मिश्रण तयार भएको छ । फिल्मका कार्यकारी निर्माता सौगात बस्नेतले रेखाको उपस्थितिले ‘फ्रेन्च किस’लाई राष्ट्रिय तथा अन्तर्राष्ट्रिय स्तरमै चर्चा दिलाउने विश्वास व्यक्त गरेका छन् ।

@parikalanewsofficial

“रेखा थापा लामो समयदेखि नेपाली फिल्म क्षेत्रमा आफ्नो दमदार अभिनय र प्रभावशाली उपस्थितिका कारण एक ब्राण्ड बनिसक्नुभएको छ,” निर्माता बस्नेतले भने, “उहाँको इन्ट्रीसँगै हाम्रो फिल्म थप सशक्त र प्रतिक्षित बन्नेमा हामी विश्वस्त छौँ । यो फिल्ममार्फत दर्शकले उहाँलाई नयाँ पुस्ताको प्रेमकथामा बिल्कुलै फरक अवतारमा देख्न पाउनुहुनेछ ।”

फिल्मको निर्देशन अभिनेता समेत रहेका अर्पण थापा स्वयंले गरिरहेका छन् । निर्माण टिमले यस फिल्मलाई नयाँ पुस्ताको स्वाद अनुसारको आधुनिक प्रेमकथामा ढालिरहेको जनाएको छ । फिल्मको सह-निर्मातामा सुभाष बी. शाही, सिनेमेटोग्राफीमा सुदीप बराल, संगीतमा चर्चित गायक तथा संगीतकार दीपक बज्राचार्य र पब्लिसिटी डिजाइनमा रोयल भीमसेन (ट्राइडेन्ट कन्सेप्ट) रहेका छन् । सन् २०२६ भित्र प्रदर्शनमा ल्याउने लक्ष्य राखिएको ‘फ्रेन्च किस’ को छायांकन हाल चितवनमा धमाधम भइरहेको छ ।