इजिप्टमा हुने ‘मिस इको इन्टरनेशनल २०२६’ मा नेपालको प्रतिनिधित्व गर्दै सेजल राजभण्डारी

इटहरी/ विश्वभरको पर्यावरण र पर्यटन प्रवर्द्धन गर्ने उद्देश्यले इजिप्टमा आयोजना हुने प्रतिष्ठित अन्तर्राष्ट्रिय सौन्दर्य प्रतियोगिता ‘मिस इको इन्टरनेशनल २०२६’ मा यसपटक नेपालको झण्डा सेजल राजभण्डारीले फहराउने भएकी छन् । आगामी अप्रिलमा हुने उक्त विश्वस्तरीय प्रतिस्पर्धामा ७४ भन्दा बढी देशका ‘इको सुन्दरी’हरूको सहभागिता रहनेछ, जहाँ सेजलले नेपालको तर्फबाट एकल प्रतिनिधित्व गर्दैछिन् ।

नेपालको लागि आधिकारिक प्रतिनिधि छनोट गर्ने संस्था ‘ग्रीन आर्ट मिडिया’ले बिहीबार अबेर साँझ महाराजगञ्जस्थित ‘द हाइट रेस्ट्रो एण्ड वेलनेस’मा एक विशेष कार्यक्रमको आयोजना गरेको थियो । सोही समारोहमा अघिल्लो संस्करणकी विजेता मिस इको इन्टरनेशनल नेपाल २०२४ संस्कृति भट्टले सेजललाई ‘मिस इको इन्टरनेशनल नेपाल २०२६’ को ताज पहिर्याउँदै सफलताको शुभकामना दिएकी थिइन् ।

शिरमा ताज सजिएपछि भावुक बनेकी सेजलले यसलाई आफ्नो जीवनको एक अमूल्य र महत्त्वपूर्ण अवसरको रूपमा लिएको बताइन् । उनले आफूलाई योग्य सम्झेर यो मञ्च प्रदान गरेकोमा ग्रीन आर्ट मिडियाप्रति कृतज्ञता प्रकट गरिन् । “अन्तर्राष्ट्रिय मञ्चमा पुगेर नेपालको मौलिक संस्कृति, परम्परा र हाम्रा मनमोहक पर्यटकीय स्थलहरूको विश्वभर प्रचारप्रसार गर्नु नै मेरो मुख्य लक्ष्य हुनेछ,” सेजलले प्रतिबद्धता व्यक्त गरिन् ।

@parikalanewsofficial

विश्व मञ्चमा खरो उत्रिनका लागि सेजललाई अब विशेष ग्रुमिङ प्रदान गरिनेछ । यसका लागि ग्रीन आर्ट मिडियाकी प्रबन्ध निर्देशक तथा अन्तर्राष्ट्रिय कोरियोग्राफर अनिला श्रेष्ठलगायत नेपालका ख्यातिप्राप्त व्यक्तिहरूले उनलाई तयार पार्नेछन् । कोरियोग्राफर श्रेष्ठ सन् २०१४ देखि नै यस प्रतियोगिताका लागि नेपालको आधिकारिक राष्ट्रिय निर्देशकका रूपमा कार्यरत छिन् ।

एल.टी.सी.पी. अर्गनाइजेशनद्वारा सन् २०१४ देखि इजिप्टमा आयोजना हुँदै आएको यो प्रतियोगिताको मुख्य नारा ‘ब्युटी फर इको’ रहेको छ । ग्रीन आर्ट मिडियाका सीईओ प्रविन लाकौलका अनुसार, विश्वभरका पर्यावरण र संस्कृतिलाई अन्तर्राष्ट्रिय नेटवर्कमार्फत जोड्दै सकारात्मक सूचना र सन्देश प्रवाह गर्नु नै यस प्रतियोगिताको मुख्य लक्ष्य हो ।