चुनावको मुखमा युट्युबमा ‘पोलिटिकल फिल्म’: संयोग कि बालेनको ‘सिनेमा क्रान्ति’को मास्टरप्लान ?

इटहरी/ आउँदो फागुन २१ गते नेपालमा अन्तरिम सरकारले गराउन लागेको चुनावको मिति जति-जति नजिकिँदै छ, राजनीतिक सरगर्मी पनि त्यति नै बढ्दो छ । तर, यसपटक चुनावी मैदानको रापताप सडक र चोकमा मात्र सीमित छैन, यो नेपाली युट्युब तथा सामाजिक सञ्जालमा पनि सरेको छ । पछिल्लो समय भ्रष्टाचार, कुशासन र राजनीतिक बेथितिको पर्दाफास गर्ने ‘पोलिटिकल ड्रामा’ जनराका फिल्महरू धमाधम युट्युबमा रिलिज भइरहेका छन् ।

पुराना नेता र पार्टीले देश बर्बादीमा पुर्‍याएको र अब नयाँ अनुहारले अवसर पाउनुपर्ने जबर्जस्त सन्देश बोकेका यी फिल्महरू चुनावकै मुखमा एकपछि अर्को गर्दै सार्वजनिक हुनुले अहिले एउटै ठूलो प्रश्न खडा गरेको छ- यो केवल एउटा संयोग हो या कुनै सुनियोजित चुनावी रणनिती ? हलमा दर्शकको बम्पर साथ पाएको दिमाग खराब फिल्म २ साताअघि ‘ओएसआर मुभिज’बाट युट्युबमा रिलिज भयो ।

दयाहाङ राई, खगेन्द्र लामिछाने, स्वस्तिमा खड्का र निश्चल बस्नेत स्टारर यो फिल्मलाई हालसम्म ५४ लाखभन्दा बढी पटक हेरिसकिएको छ । भर्खरै हलमा प्रदर्शन भएको फिल्म झरी पछिको इन्द्रेणी यही बिहीबार मात्र युट्युबमा आयो । रोचक कुरा त के छ भने, यो फिल्म रास्वपाका वरिष्ठ नेता तथा झापा क्षेत्र नम्बर ५ का उम्मेदवार बालेन्द्र शाहको आधिकारिक युट्युब च्यानलबाट सार्वजनिक गरिएको हो । गणेश उप्रेती, रमेश उप्रेती, दीपाश्री निरौला, अर्जुन घिमिरे पाँडे लगायतको अभिनय रहेको यो फिल्मले छोटो समयमै १२ लाख ७५ हजार बढी भ्युज कटाइसकेको छ ।

@parikalanewsofficial

हिजो शुक्रबार ‘ओएसआर मुभिज’ले अर्को प्रतीक्षित फिल्म ‘सेन्टी भाइरस’ पनि सार्वजनिक गरेको छ । यो फिल्म ६ लाख ७४ हजार भन्दा बढी पटक हेरिएको छ । सिताराम कट्टेल धुर्मुस, कुञ्जना घिमिरे सुन्तली, दयाहाङ राई, विल्सन विक्रम राई र बुद्धि तामाङ जस्ता दिग्गज कलाकारको यसमा अभिनय रहेको छ । सामाजिक सञ्जालमा अहिले यो ट्रेन्डलाई लिएर चर्चा सुरु भएको छ । धेरैले यी फिल्महरुको युट्युब रिलिजलाई रास्वपा र विशेषगरी बालेन शाहको ‘डिजिटल चुनावी रणनीति’ भनेर अथ्र्याउन भ्याएका छन् । यसको आधिकारिक पुष्टि वा यथेष्ट प्रमाण त सार्वजनिक भएको छैन, तर यी तीनवटै फिल्म निर्माण गर्ने टिम र केही फिल्मकर्मीहरू बालेननिकट मानिनुले धेरै कुराको संकेत गर्छ ।

यसलाई राजनीतिक परिवर्तनका लागि सुरु भएको ‘सिनेमा क्रान्ति’ भन्न सकिने अवस्था सिर्जना भएको छ । जे उद्देश्यले रिलिज गरिएको भए पनि, यी फिल्महरूले आम नेपाली मतदातालाई आफ्ना असल र योग्य प्रतिनिधि चुन्न भने निकै ठूलो सहयोग र सचेतना प्रदान गर्ने निश्चित छ । स्मरण रहोस्, यसपटकको चुनावमा बालेन शाह झापा क्षेत्र नम्बर ५ मा एमाले अध्यक्ष तथा पूर्वप्रधानमन्त्री केपी शर्मा ओलीसँग प्रत्यक्ष चुनावी भिडन्तमा उत्रिएका छन् । अब यो सिनेमा क्रान्तिले झापा-५ लगायत देशभरको चुनावी नतिजामा कस्तो प्रभाव पार्छ, त्यो भने फागुन २१ पछिको नतिजाले पक्कै बताउनेछ ।