नीतिको बिहेको तारिफ गर्दै पूजालाई ज्योतिको व्यङ्ग्य: ‘बिहे हुन हेलिकप्टर होइन, खानदान चाहिन्छ’

इटहरी/ नेपाली फिल्म जगतकी सुन्दरी अभिनेत्री नीति शाहको विवाह हिजो मात्रै सम्पन्न भएको छ । उनको विवाहको परम्परागत र ‘राजकीय’ शैलीको यतिबेला चौतर्फी प्रशंसा भइरहेको छ । यसै सन्दर्भमा, चर्चित तथा विवादित गायिका ज्योति मगरले नीतिको विवाहको उदाहरण दिँदै अर्की अभिनेत्री पूजा शर्माको विवाहलाई घुमाउरो पारामा कडा व्यङ्ग्य गरेकी छन् ।

सामाजिक सञ्जालमा सधैँ खरो रूपमा प्रस्तुत हुने ज्योतिले यसपटक ‘हेलिकप्टर’ र ‘खानदान’ को तुलना गर्दै स्टाटस लेखेकी छन् । आफ्नो फेसबुक स्टाटसमा ज्योतिले विवाह भव्य देखाउन पैसा र हेलिकप्टरको तामझामभन्दा पनि खानदान र परम्परा महत्त्वपूर्ण हुने विचार व्यक्त गरेकी छन् । उनले लेखेकी छन्, “बिहे भव्य र राजकीय देखिनलाई हेलिकप्टर होइन खानदान र परम्परा म्याटर गर्दो रैछ भन्ने नीति शाहको बिहे हेरेर थाहा भयो ।”

@parikalanewsofficial

ज्योतिले स्टाटसमा कसैको नाम त किटान गरेकी छैनन्, तर उनको सीधा निशाना अभिनेत्री पूजा शर्मातर्फ रहेको प्रस्ट बुझ्न सकिन्छ । केही समयअघि मात्र विवाह बन्धनमा बाँधिएकी पूजाले आफ्नो विवाहमा हेलिकप्टरबाट पुष्पवृष्टि गराएर निकै चर्चा र केही आलोचना बटुलेकी थिइन् । सोही तामझामलाई लक्षित गर्दै ज्योतिले थपेकी छन्, “पैसाले मातिएका हेलिकप्टरे सेलिब्रेटीहरु जति नै टाँटछाँट गरे नि स्वाङ भन्दा भ्वाङ ठूलो जस्तो लाग्ने के हामी गरिबलाई फेरि !”

व्यङ्ग्यसँगै ज्योतिले आफूलाई ‘गरिब’ भन्दै रमाइलो शैलीमा प्रस्तुत गरेकी छन् । न त राजकीय खानदान भएको न त देखावा गर्ने पैसा भएको भन्दै उनले अरुको कुरा काट्नु नै आफ्नो काम भएको बताएकी छन् । स्टाटसको अन्त्यमा उनले लेखेकी छन्, “रोयल खानदान नि नभाको, स्वाङ पार्ने पैसा नि नभाको हामी जस्ता गरिबको कामै अरुको हेर्ने र कुरा काट्ने हो । माइन्ड नगर्नु है, कसैसँग मेल खाएमा यो गरिबलाई माफ गर्दिनु ।”