फिल्म ‘जिरो डिग्री’को मुख्य भूमिकामा सनिशा भट्टराई अनुबन्धित

इटहरी/ नेपाली फिल्म क्षेत्रमा एउटा फरक र रोचक कथावस्तु बोकेको फिल्म ‘जिरो डिग्री’ छायाङ्कनको अन्तिम तयारीमा छ । यसै मेसोमा निर्माण पक्षले फिल्मको मुख्य नायिकाको रूपमा अभिनेत्री सनिशा भट्टराईलाई भित्र्याएको छ । सनिशाको प्रवेशसँगै फिल्मको स्टारकास्ट थप बलियो र आकर्षक बनेको छ ।

रङ्गमञ्च र फिल्म दुवैमा आफ्नो जीवन्त अभिनयका लागि चिनिएका अभिनेता विजय बराल यस फिल्मको मुख्य भूमिकामा छन् । यद्यपि, पर्दामा सनिशा र विजयको जोडी बाँधिने हो वा उनीहरूको भूमिका फरक हुनेछ भन्ने विषयलाई निर्माण पक्षले अहिले ‘सस्पेन्स’मै राखेको छ । मेघौली फिल्म्सको ब्यानरमा निर्माण हुन लागेको यो फिल्म पूर्ण रूपमा डार्क कमेडी जनरामा आधारित छ ।

यसको कथावस्तु निकै मौलिक र कौतूहलपूर्ण छ । सडक सञ्जालसमेत राम्ररी नपुगेको एउटा विकट गाउँमा आमाबुवाको निधन हुन्छ । विदेशमा रहेका सन्तान गाउँ नफर्कुन्जेल शवलाई सुरक्षित राख्नुपर्ने हुन्छ । त्यसका लागि गाउँसम्म ‘डीप फ्रिज’ बोकेर लैजाँदा बाटोमा उत्पन्न हुने उथलपुथलपूर्ण परिस्थिति र रमाइला घटनाक्रमहरू नै फिल्मको मुख्य कथा हो ।

@parikalanewsofficial

फिल्मले छायाङ्कनमा जानुअघि नै प्रचारप्रसारको फरक शैली अपनाउँदै व्यङ्ग्यात्मक गीत ‘अरे हो नेता जी’ सार्वजनिक गरिसकेको छ । अभिनेता विजय बराल र गायक अङ्कित बाबु अधिकारीको उक्त गीतमा स्वर रहेको छ भने शब्द युवराज काफ्ले र संगीत अङ्कित बाबु अधिकारीको रहेको छ ।

यो गीतले समसामयिक राजनीति र विकासको नाममा गरिने टालटुले प्रवृत्तिमाथि निकै तिखो व्यङ्ग्य गरेको छ । फिल्मको निर्देशन तथा पटकथा आकास बराल र साजन काफ्ले संयुक्त रुपमा गरेका छन् भने कथा तथा अभिनय राजन भुसालको हो । फिल्मको कार्यकारी निर्माता मोती कार्की रहेका छन् भने छायाङ्कन निशाल पौडेलले गरेको फिल्मलाई देशभर वितरणको जिम्मा कुबेर सिने डिस्ट्रिब्युसनले लिएको छ ।