निखिल उप्रेती भिलेन बन्दा ‘पारस’ को मुख्य भूमिकामा सुशील श्रेष्ठको इन्ट्री

इटहरी/ नेपाली फिल्मका ‘एक्सन किङ’ निखिल उप्रेतीलाई खलनायकको रूपमा उभ्याएर निर्देशक कृषा चौलागाईंले निर्माण गर्न लागेको फिल्म ‘पारस’ को मुख्य नायक को होला ? दर्शकमाझ लामो समयको सस्पेन्स तोड्दै युवा स्टार सुशील श्रेष्ठ यस फिल्मको शीर्ष भूमिका अर्थात् पारसका लागि औपचारिक रूपमा अनुबन्धित भएका छन् । अन्य कलाकारहरूको टुङ्गो लागिसक्दा पनि मुख्य पात्रलाई गोप्य राखिएको यस प्रोजेक्टले अहिले नेपाली फिल्म वृत्तमा ठूलो चर्चा बटुल्दैछ ।

एकातिर एक्सनमा माहिर निखिलको डरलाग्दो खलनायक अवतार र अर्कोतिर नव एक्सन स्टार सुशीलको नायकत्व- यी दुई पुस्ताका स्टारबीच पर्दामा हुने महाभिडन्त दर्शकका लागि निकै नयाँ र रोमाञ्चक अनुभव हुने पक्का छ । फिल्मलाई अझ आकर्षक र ग्ल्यामरस बनाउन चर्चित अभिनेत्रीद्वय जसिता गुरुङ र प्रियङ्का कार्की पनि यसअघि नै टिममा जोडिसकेका छन् ।

तर, सुशीलको जोडी बनेर पर्दामा जसिता देखिनेछिन् या प्रियङ्का ? यो रहस्यलाई भने निर्माण टिमले अझै पनि गोप्य नै राखेर कथाप्रतिको कौतूहल थप बढाएको छ । एक्सनका साथै बलियो सामाजिक कथावस्तु बोकेको ‘पारस’ ले नेपाली फिल्म क्षेत्रमा एउटा फरक स्वाद पस्कने अपेक्षा गरिएको छ । फिल्मको सुटिङ कहिले सुरु हुन्छ र रिलिज मिति कहिले तय हुन्छ भन्नेबारे निर्माण पक्षले छिट्टै विस्तृत जानकारी गराउने तयारी गरेको छ ।

@parikalanewsofficial