यौनकर्मीको संघर्ष र भोगाइमा आधारित फिल्म ‘लालिमा’को अर्थपूर्ण दोस्रो पोस्टर सार्वजनिक

इटहरी/ नेपालको प्रतिनिधिसभा निर्वाचनपछि फागुन २९ गते प्रदर्शनमा आउने एक मात्र नेपाली फिल्म ‘लालिमा’को दोस्रो अफिसियल पोस्टर सार्वजनिक भएको छ । निर्माण पक्षले सार्वजनिक गरेको यस नयाँ पोस्टरमा फिल्मकी मुख्य नायिका रोशनी कार्कीलाई एकल रूपमा प्रस्तुत गरिएको छ । पहिलो पोस्टरले दर्शकमाझ सिर्जना गरेको कौतुहल र चासोलाई सम्बोधन गर्दै यो दोस्रो पोस्टर ल्याइएको हो ।

सार्वजनिक पोस्टर निकै अर्थपूर्ण र प्रतीकात्मक छ । पोस्टरमा नायिका रोशनीलाई समस्याले घेरिएको तर आत्मविश्वासी, सहनशील र शान्त मुद्रामा देखाइएको छ । शरीरको माथिल्लो भागमा कपडाविहीन अवस्थामा रहेकी उनी झ्यालबाट कोठाभित्र छिरिरहेको प्रकाशमा उभिएकी छन् । पीडापछिको शान्त भाव झल्काउने यो तस्बिरले उनी फिल्ममा यौनकर्मीको चरित्रमा रहेको प्रस्ट संकेत गर्छ । पोस्टरमा फिल्मको नाम रातो रङमा लेखिएको छ भने नाटकीय सिनेम्याटिक प्रकाशको उत्कृष्ट प्रयोग गरिएको छ ।

फिल्मका लेखक तथा निर्देशक रोशन मिराजका अनुसार यो पोस्टरले जागरण र आत्मबलको सन्देश दिन्छ । उनी भन्छन्, “पहिलो पोस्टरले असहायता र रहस्यलाई केन्द्रमा राखेको थियो । नयाँ पोस्टरले भने शक्ति, आत्मविश्वास, सहनशीलता र परिवर्तनको संकेत दिन्छ । यसले यो केवल डरको कथा मात्र होइन, जागरण र आत्मबलको कथा पनि हो भन्ने सन्देश बोकेको छ ।”

@parikalanewsofficial

यो फिल्म करिब तीन हजार यौनकर्मीहरूको वास्तविक अनुभव, संघर्ष र भोगाइमा आधारित रहेर तयार पारिएको निर्माण पक्षको दाबी छ । फिल्ममा रोशनी कार्की, जीवन भट्टराईका साथै उषा रजक, सुष्मा निरौला, घनश्याम जोशी, सबिन कट्टेल र शिशिर वाङ्देल लगायतको अभिनय रहेको छ । फिल्ममा कार्यकारी निर्माताको रुपमा रीना लामा रहेकी छन् भने वितरक नेसनल सिने ग्रुप नेपालले गर्नेछ । फागुन २९ गतेदेखि देशभरका फिल्म हलहरूमा रिलिज हुने ‘लालिमा’ले यौनकर्मीको नभनिएको कथा र उनीहरूको भित्री शक्तिलाई पर्दामा ल्याउने अपेक्षा गरिएको छ ।