विराज र सुपुष्पाको रोमान्ससँगै सुरु भयो ‘राम नाम सत्य’को प्रचार, चैत २७ मा रिलिज हुँदै

इटहरी/ ‘पर्दा पछाडिको पर्दा’ को रहस्यमयी थिम बोकेको बहुप्रतिक्षित फिल्म ‘राम नाम सत्य’ ले आफ्नो औपचारिक प्रचारप्रसार सुरु गरेको छ । आगामी चैत्र २७ गतेलाई प्रदर्शन मिति तोक्दै निर्माण पक्षले फिल्मको पहिलो रोमान्टिक गीत ‘धागोले बाटेको’ सार्वजनिक गरेर दर्शकमाझ माहोल तताएको हो ।

एक्सन, सस्पेन्स र प्रेमकथाको उत्कृष्ट मिश्रण रहेको यस फिल्मलाई माइकल चन्दले निर्देशन गरेका हुन् । सार्वजनिक ‘धागोले बाटेको’ बोलको गीतमा फिल्मका मुख्य अभिनेता विराज भट्ट र अभिनेत्री सुपुष्पा भट्टलाई फिचरिङ गरिएको छ । भिडियोमा यी दुईको रोमान्टिक अवतार र उत्कृष्ट केमेस्ट्री देख्न सकिन्छ । सार्वजनिक गीतमा बाबुल गिरी र रचना रिमालको स्वर समावेश छ भने संगीत बाबुल गिरी र शब्द डा. डिआर उपाध्यायको रहेको छ । हेर्नुस् गीत ।

यस्तै फिल्मको क्रिएटिभ प्रोड्युसर मोती कार्की हुन भने लाइन प्रोड्युसर राजेन्द्र आचार्य हुन् । बाबुल गिरी, अर्जुन पोखरेल, एसडी योगी र नवा अन्सारीको संगीत यो फिल्ममा रहेको छ । मानकृष्न महर्जनको छायांकन, श्री श्रेष्ठ को एक्सन निर्देशन, सियोन श्रेष्ठको कोरियोग्राफी, बन्दे प्रसादको सम्पादन, राजेन्द्र मोक्ताङको कलर ग्रेडिङ, काला चरणको ब्याकग्राउन्ड म्युजिक, मुख्य सहायक निर्देशक नवराज शर्मा रहेको फिल्मको टिजर र ट्रेलर शाहिल खानाले तयार गरेका हुन् ।