गायिका ऋचा काफ्लेको मौलिक तीज गीत ‘भदौरे झरी’ सार्वजनिक

इटहरी/ मौलिक लोकलय तथा संगीनी भाकामा ‘भदौरे झरी’ बोलको तीज गीतको भिडियो सार्वजनिक गरिएको छ । शुक्रवार युट्युब मार्फत सार्वजनिक गरिएको गीतमा गायिका ऋचा काफ्लेको स्वर समावेश गरिएको छ । सार्वजनिक गीतलाई गणेश खड्काले लेखेका हुन् । पुराना चर्चित संगीतकार तथा गायक दुर्गा पराजुलीले संगीत गरेको ‘भदौरे झरी’ गीतलाई एरेन्ज भने राजु कार्किले गरेका छन् ।

संगीतकार पराजुलीको इटहरीमा अवस्थित सुनाखरी कला कुन्जमा सोमबार पत्रकार भेटघाट गर्दै सार्वजनिक गीत तथा भिडियोको बारेमा जानकारी गराईएको थियो । तिजलाई लक्षित गरेर सार्वजनिक हुने कतिपय गीतहरुमा बढ्दो विकृतिलाई प्रोत्साहित गर्ने र गलत अर्थ दिने किसिमका हुन्छन्, त्यसैले सो कुराहरुलाई पन्छाउँदै गीतमा मौलिकपन झल्काउदै पारिवारिक वातावरणमा हेर्न र सुन्न मिल्ने गीत तथा भिडियो सार्वजनिक गरिएको गायिका ऋचाको भनाई छ । हेर्नुस् भिडियो ।

सार्वजनिक ‘भदौरे झरी’ गीतको भिडियोलाई निर्देशन तथा सम्पादन शिर कुमार साम्पाङले गरेका छन् भने दिनेश राईले छायांकन गरेका हुन् । यस्तै महेश सिग्देलले श्रिङ्गार गरेको भिडियोमा नागी डान्स सेन्टरले नृत्य गरेको छ । आइस्वर लिम्बुले कोरियोग्राफी गरेको भिडियोमा गायिका आफै पनि फिचर्ड भएकी छिन् । रमिला काफ्ले, मिनु मादेम्बा लिम्बू, बिमला गुरुङ, कल्पना राई, रिना राई, रोजिना धमला, कविशा दाहाल लगायतलाई भिडियोमा फिचर्ड गरिएको छ । उक्त भिडियोलाई गायिका ऋचाकै नाममा खोलिएको युट्युब च्यानलबाट सार्वजनिक गरिएको हो ।