फिल्म ‘ह्यासट्याग माया’मा सारुकले गरेको अभिनय म्युजिक भिडियोमा आउने

इटहरी/ फिल्म ‘ह्यासट्याग’ मायाको छायांकन गर्दागर्दै आत्महत्या गरेका अभिनेता सारुक ताम्राकारको मेहनत र अन्तिम कामलाई दर्शकमाझ ल्याईने भएको छ । उनले अभिनय गरेको फिल्म ह्यासट्याग माया’मा समावेश गरिने गीत र फुटेजलाई मात्र म्युजिक भिडियोको स्वरुपमा सार्वजनिक गर्न लागिएको हो ।

४० प्रतिशत छायांकन सकिएको फिल्मको सेटबाट घर फर्किएका उनले असार २१ गते राति आफ्नै घरमा कोहि नभएको मौकामा आत्महत्या गरेका थिए । फिल्म निर्माण युनिटले कार्यक्रममार्फत सार्वजनिक गरेर युट्युबमा रिलिज गर्ने तयारी गरिरहेको छ ।

सारुकको उक्त भिडियोलाई श्रद्धाञ्जली व्यक्त गर्ने उद्देश्यले सार्वजनिक गर्न लागिएको ‘ह्यासट्याग माया’ फिल्म निर्माण युनिटको भनाइ रहेको छ । उक्त भिडियोमा सारुक र अर्कि एक अभिनेत्रीको अभिनयको फुटेज समावेश गरिनेछ तर सो फिल्मकी अभिनेत्री नम्रता श्रेष्ठलाई भने सार्वजनिक हुने म्युजिक भिडियोमा समावेश नगरिने भएको छ । फिल्म निर्माण युनिटले ‘ट्रिब्युट टु सारुक’ नाम दिइएको सो भिडियोलाई आउँदो साता सार्वजनिक गर्नेछ ।