इटहरीमा आदिवासी जनजाति तथा मातृभाषी चलचित्रसम्बन्धि बिचार गोष्टि गरिने

इटहरी/ कोशी प्रदेश पछिल्लो समय चलचित्रको हब बन्ने क्रममा छ । फिल्मका छायांकन, प्रचारप्रसार संगै स्थानीय भाषाभाषीका फिल्महरुको निर्माणसंगै विशेष शोहरु बाक्लिदो क्रममा छ । यता यो क्षेत्र र यहाँका कलाकारहरुलाई प्रवर्द्धन तथा सम्मानसंगै सहजीकरण गर्ने संघसंस्थाहरु पनि प्रसस्तै खुलेका छन् । जस्ले चलचित्र र चलचित्रकर्मीसंग सम्बन्धित गतिविधिहरुलाई तिब्रता दिइरहेको अवस्था छ ।

यस्तैमा चलचित्र विकास बोर्ड अन्तर्गतको ‘आदिवासी जनजाती मातृभाषी चलचित्र प्रवर्द्धन समिती’को आयोजनामा बृहत् ‘बिचार गोष्टि कार्यक्रम-२०८१’ को आयोजना गर्ने भएको छ । यहि असारको २० गते बिहिवारका दिन सुनसरीको इटहरीमा अवस्थित ‘इटहरी पार्टी प्यालेस’मा यो कार्यक्रमको आयोजना गरिने भएको हो । कार्यक्रमलाई ‘आदिवासी जनजाति चलचित्र महासंघ, कोशी प्रदेश’ ले सह-आयोजना गर्दैछ ।

कार्यक्रममा वरिष्ठ चलचित्रकर्मीको सहभागीता गराईने र आदिवासी जनजाति मातृभाषी चलचित्र निर्माण, प्रवर्द्धन, सहकार्य र सहजीकरणको लागी बिचार सुन्ने र बृहत् छलफल गर्ने आयोजक संस्थाका संयोजक ज्योतिराज राईले जानकारी गराए । ‘आदिवासी जनजाती मातृभाषी चलचित्र प्रवर्द्धन समिती’ले पछिल्लो समय देशका विभिन्न ठाउँमा कार्यक्रम आयोजना गरेर आदिवासी जनजाति तथा मातृभाषीका चलचित्र निर्माण र प्रवर्द्धनका लागी सहजीकरणमा महत्त्वपूर्ण भुमिका खेल्दै गइरहेको छ ।