इटहरी/ निर्माता सन्तोष सेनको निर्माण तथा निर्देशन रहने फिल्म ‘बलिदान’को टिमअप बलियो बन्दै गैरहेको छ । सन्तोषको मेगा प्रोजेक्टको रूपमा रहेको ‘बलिदान’का लागि दक्षिण भारतका सयौँ करोडका प्रख्यात चलचित्रहरू बनाइसकेका चर्चित द्वन्द्व निर्देशक, छायाकार तथा अन्य प्राविधिकको टोली निर्माण पक्षले महँगो पारिश्रमिकमा फाईनल गरेको छ । जसमा, द्वन्द्व निर्देशक स्टन्डर साम र छायाकार शरण ऋषि सहित करिब ५० जनाको प्राविधिक टिमले नेपाल आएर ‘बलिदान’मा काम गर्नेछन् ।
द्वन्द्व निर्देशक सामले राणा दगुबत्तीको चर्चित फिल्म ‘हात्ती मेरे साथी’, चियान विक्रमको फिल्म ‘थङ्गलम’ लगायतमा काम गरिसकेका छन् । छायाकार ऋषि गत हप्ता रिलिज भएको नेपाली फिल्म ‘बाटो: रोड टु डेथ’का छायाकार हुन् । हाल नेपालमा उनको छायाङ्कनको खुलेरै तारिफ भइरहेको छ । त्यस्तै, उनले दक्षिण भारतमा चर्चित फिल्महरू सुपरस्टार रजीनिकान्तको फिल्म ‘पेट्टा’ र सुपरस्टार चिरञ्जीवीको फिल्म ‘आचार्य’को छायाङ्कन टिममा रहेर काम गरेका छन् ।
यो संगै छायाङ्कनमा प्रयोग गरिने लाइट, साउन्ड, क्यामेरा लगायतका प्राविधिक सामग्रीहरू समेत भारतको मुम्बईबाट ल्याउने निर्देशक सेनले बताए । गलत व्यक्तिहरूबाट भइरहेको नेपालको सार्वभौम माटोको शोषण र थिचोमिचोमा आधारित कथा र निरङ्कुश एवम् समाजका तथाकथित नाइकेहरूको बलि दिनुपर्ने सारांशमा आधारित नेपाली फिल्म ‘बलिदान’ छायाङ्कनको लगभग अन्तिम चरणमा छ । फिल्मका लागी यतिबेला इटहरीमा अवस्थित फिल्म छायांकनका लागी नेपालकै ठूलो इन्डोर स्टुडियो ‘बिएमसि स्टुडियो’संगै बिराटनगर, कानेपोखरी लगायत ठाउँमा सेट बनाउने कार्य भैरहेको छ । बलिदानको करिब ६० प्रतिशत छायांकन सोहि स्टुडियोमा नै हुनेछ ।
नेपालमा यस किसिमको चलचित्र उत्पादन ऐतिहासिक र युगान्तकारी साबित बनाउन निर्माण टिम ठुलो मेहनत र लगानी खर्चेर प्रि-प्रोडक्सनमा लागीपरेको छ । फिल्मका निर्माता तथा निर्देशक सन्तोष भन्छन्, ‘हामीले बलिदानलाई उच्चस्तरीय नेपाली चलचित्र बनाउन कुनै पनि कसर बाँकी नराख्ने प्रण गरेका छौँ । यसको लागि हामीले दक्षिण भारतबाट प्राविधिक र मुम्बईबाट इक्विपमेन्टहरू ल्याएर काम गर्दैछौँ । यो एक सामान्य चलचित्र मात्र नभएर नेपाली चलचित्र उद्योगका लागि एक ऐतिहासिक, क्रान्तिकारी र महान् चलचित्रको ढोका खोल्ने कोशेढुङ्गाका रूपमा साबित गराउनेछौँ ।’
‘बलिदान’को प्रमुख भूमिकामा नेपाली फिल्मका एक्सन अभिनेता बिराज भट्टका छोरा समीर भट्टले अभिनय गर्दैछन् । एक ‘प्याकेज हिरो’को सम्भावना बोकेका भट्टले लामो समयदेखि भारतको मुम्बईमा रहेर अभिनय, मार्सल आर्ट, नृत्य र द्वन्द्वमा तालिमहरू गरिरहेका थिए । यस फिल्ममा अभिनेता त्रय सौगात मल्ल, अर्पण थापा, दिव्य देव तथा अभिनेत्री ऋचा शर्माको पनि प्रमुख अभिनय रहनेछ । यता कोशी प्रदेशका कलाकारलाई पनि सहभागी गराउने उद्देश्य सहित केही साताअघि २ दिन लगाएर निर्माण टिमले इटहरीमा अडिसन लिएको थियो । आसुसेन फिल्मस् प्रा.ली. तथा सन्तोष सेनको प्रस्तुति रहने यस फिल्ममा निर्माताको रूपमा पवन ब्राडफोर्ड बिस्ट तथा सह निर्माता प्रेम पुरी रहेका छन् ।
Discussion about this post