उपासना र धिरजको प्रेम अनि पिंडा झल्किएको ‘खुस्मा’को २ पोस्टर सार्वजनिक

इटहरी/ अभिनेता धिरज मगर र अभिनेत्री उपासना सिंह ठकुरीको प्रमुख भुमिका रहने फिल्म ‘खुस्मा’को २ पोस्टर सार्वजनिक भएको छ । केहि साताअघि छायांकन सकेर हाल पोस्ट प्रोडक्सनमा रहेको फिल्म निर्माण युनिटले प्रचारप्रसार स्वरुप पोस्टर सार्वजनिक गरेको हो ।

असोज ३ गतेबाट सार्वजनिक प्रदर्शनमा आउने फिल्मको सार्वजनिक एक पोस्टरमा उपासना एक्लै निराश अवस्थामा आँशु थाम्न नसकेको परिस्थितिमा देखिएकी छन् भने अर्को पोस्टरमा उपासना र धिरज प्रेमिल भावमा प्रस्तुत भएका छन् ।

द्वन्द्वकालको अवस्था र मगर समुदायको युवा प्रेम प्रस्तुत गरिने फिल्मलाई अशोक थापा मगरले निर्देशन गरेका छन् । एम मिडिया प्रालिको व्यानरमा निर्माण भएको यो फिल्म ‘खुस्मा’को निर्माता चन्द्र भट्टचन हुन् । यस्तै वीर बहादुर लामा, चन्द्र बहादुर भट्टचन, बेतान मगर, मान बहादुर मगर र सुस्मिता बुढाथोकी पनि यो फिल्मको निर्मातामा रहेका छन् ।

फिल्ममा उपासना र धिरजको अलावा माओत्से गुरुङ, सुजाता राई, विजय संयोग सुब्बा, राजु रेग्मी मगर, राज थापा काउचा, अस्तित्व भट्टचन, संगीता थापा मगर, अरुण पुन मगर, सारा राई लगायतका कलाकारको पनि अभिनय रहेको छ ।