इटहरी/ ‘फर्की फर्की’ पछि अनमोलले समय दिएको फिल्म ‘जेरी अन टप’मा अभिनेत्री जसिता गुरुङको इन्ट्री भएको छ । उनी यसअघि यो फिल्ममा फाईनल भएकी आना शर्माको ठाउमा आएकी हुन् । अर्थात आना फिल्मबाट बाहिरिएकी छन् । यो कुराको जानकारी क्रियटिभ निर्माता रोहित अधिकारीले गराएका हुन् । यो फिल्मबाट आनापछि अभिनेत्री आँचल शर्मा अनुबन्धित भएकी थिइन् । आँचल भने यथावत छिन् ।
फिल्मको लागी प्रोमोसनल फोटोसुटमा आना नआएपछि उनलाई निकालिएको श्रोतको भनाई छ । निर्माण युनिटले बारम्बार कल गर्दा समेत उनी नआएपछी उनलाई निकालेर जसितालाई फाईनल गरेको बताईएको छ । आउँदो साउनको १ गतेबाट छायांकनमा निस्कने फिल्मका लागी अनमोल र आँचल वर्कसपमा छन् भने अब वर्कसपको लागी अभिनेत्री जसिताले पनि तयारी थाल्नेछिन् ।
जसिता र अनमोलले एकपछी अर्को फिल्ममा सहकार्य गरिरहेका छन् । यसअघि यि २ ले फिल्म ‘फर्की फर्की’मा काम गरेका थिए । यता आँचलले भने अनमोल र जसितासंग पहिलो पटक सहकार्य गर्दैछिन् । सरोज न्यौपानेले दिपक भण्डारीसंगको सहकार्यमा निर्माण गर्ने फिल्म ‘जेरी अन टप’का क्रियटिभ निर्माता रोहित अधिकारी हुन् । फिल्ममा २ नायिकाको नै विशेष भुमिका रहने बताईएको छ । यो फिल्मलाई काठमाडौ, मुस्ताङ र लुक्लामा छायांकन गरिनेछ ।
Discussion about this post