इटहरी/ फिल्म घोषणा गर्दा ‘भागवत् गीता’ नाममा घोषणा भएपनि अहिले नाम परिवर्तन भएर ‘एक भागवत् गीता’ नाममा फिल्मको टिजर सार्वजनिक भएको छ । अभिनेत्री झरना थापाको निर्देशनमा बनेको फिल्मको प्रदर्शन मिति पनि सार्वजनिक गरिएको छ । आगामी भदौ २९ गते सार्वजनिक प्रदर्शनमा आउने फिल्मको ट्रेलरमा फिल्मका मुख्य पात्रहरुलाई स्थान दिइएको छ । सार्वजनिक टिजरमा देखिएको अभिनेता विपिन कार्कीको अवतारले फिल्मलाई झनै प्रतिक्षित बनाएको छ ।
मिथिला क्षेत्रको घटनालाई प्रमुख बिषय बनाएको फिल्ममा कार्किलाई कमलामाईको अवतारमा प्रस्तुत गरिएको छ । टिजरमा विपिनसंगै झरना पुत्री तथा अभिनेत्री सुहाना थापा, धिरज मगर, कबिर खड्का, जेभिस एण्ड जेभिन श्रेष्ठलाई समेत अटाईएको छ । सामाजिक द्वन्द हावी भएको टिजर १ मिनेट ३२ सेकेन्ड लामो छ । थापा परिवारको होम प्रोडक्सनमा बनेको यो फिल्म अभिनेत्री झरनाको चौथो निर्देशनात्मक फिल्म हो । हेर्नुस् टिजर ।
फिल्म निर्माण युनिटका अनुसार कसैको धार्मिक भावनामा ठेस नपुर्याउने मनसायले फिल्मको नाम ‘भागवत् गीता’ बाट ‘एक भागवत् गीता’ मा परिवर्तन गरिएको हो । सुहाना इन्टरटेन्मेन्टको ब्यानरमा निर्माण भएको यो फिल्मलाई सुनिल कुमार थापाले निर्माण गरेका हुन् । फिल्मकी अभिनेत्री सुहाना थापाको कन्सेप्टमा निर्देशक झरना थापाले कथा तयार पारेकी हुन् । झरनासंगै सरिन पोखरेल, परिच्छेद सेन, पुरुषोत्तम ढुंगेल र कृष्णको संयुक्त टिमले पटकथा तयार गरेका हुन भने परिच्छेद र पुरुषोत्तमले ‘एक भागवत् गीता’ संवाद लेखेका छन् । फिल्मलाई राजेश श्रेष्ठले छायांकन गरेका हुन् ।
Discussion about this post