इटहरी/ बहुप्रतीक्षित नेपाली फिल्म ‘छक्का पञ्जा ५’ को ‘ब्रेकअप सङ्ग’ सार्वजनिक भएको छ । चर्चित गायक बाबुल गिरीले स्वर दिएको यस गीतमा सङ्गीत, शब्द र एरेन्जमेन्टदेखि मिक्सिङ्ग र मास्टरिङ्गसम्मको सम्पूर्ण जिम्मेवारी आफैंले सम्हालेका छन् । गीतको कोरियोग्राफी गम्भीर विष्टले गरेका छन् । भिडियोमा फिल्मका प्रमुख कलाकारहरू दीपकराज गिरी, वर्षा सिवाकोटी, केदार घिमिरे ‘माग्ने बुढा’, दीपा श्री निरौला, सुरवीर पण्डित र रामेश्वर केसीलाई फिचर्ड गरिएको छ ।
गीतमा कलाकारहरूको मनमोहक नृत्य र अभिनयले दर्शकहरूलाई आकर्षित गरेको छ । केही फरक पन लाग्ने गीतको भिडियोलाई रमाइलो तवरले निर्माण गरिएको छ । ब्रेकअप भैसकेपछी बिगतलाई सम्झिएर सरापेको कुराहरु भिडियोमा रमाइलो ढङ्गले प्रस्तुत गरिएको छ । यतिबेला यो गीतले राम्रो चर्चा बटुलिरहेको छ । यसअघि पनि यो फिल्मको सार्वजनिक पहिलो गीतले अत्याधिक चर्चा पाएको थियो । हेर्नुस् फिल्मको ब्रेकअप गीतको भिडियो:
दिपक र माग्नेबुढाले दिपा र बर्षालाई सरापेको भिडियोमा देख्न सकिन्छ । त्यस्तै भिडियोमा माग्नेबुढालाई मरेको मान्छेको रुपमा प्रस्तुत गरिएको छ भने दिपकलाई हस्पिटलको बेड भर्ना भएको अवस्थामा देखाईएको छ । भिडियोको अन्त्यमा दिपाले सबै मागेको फिर्ता दिन्छु तर मेरो पनि जवानी फिर्ता दे भनेपछी माग्नेले गाली गर्नु सामाजिक अपराध हो, म फेरि मरे’ भन्दै गीतको अन्त्य हुन्छ ।
‘छक्का पञ्जा ५’ दसैँको फूलपातीको अवसर पारेर असोज २४ गतेदेखि देशभरका फिल्म हलहरुमा प्रदर्शन हुँदैछ । फिल्मका निर्माता निर्मल शर्मा र तेज गिरी रहेका छन् भने अभिनेता आर्यन सिग्देलको केमियो भूमिकाले फिल्मलाई थप रोमाञ्चक बनाउने अपेक्षा गरिएको छ ।
फिल्मको छायाङ्कन हरि हुमागाईँले गरेका छन् भने पटकथा दीपकराज गिरीले लेखेका हुन् । उनलाई कथा र संवादमा केदार घिमिरे र दिलीप तामाङले साथ दिएका छन् । फिल्मको द्वन्द्व निर्देशन रोशन श्रेष्ठले गरेका हुन् भने सम्पादन विपिन मल्लको रहेको छ । ‘छक्का पञ्जा’ शृङ्खलाका अघिल्ला चार भागहरूलाई दर्शकले अत्यधिक मन पराएको हुनाले पाँचौँ शृङ्खलाले पनि सोही सफलता प्राप्त गर्ने विश्वास गरिएको छ ।
Discussion about this post