प्रिमियरमा ‘खुस्मा’को तारिफ, हलमा दर्शकको साथ कत्तिको पाउला ?

इटहरी/ ‘खुस्मा’ फिल्म असोज ३ अर्थात् भोलि बिहीबारदेखि प्रदर्शनमा आउँदैछ । यस फिल्मको भव्य प्रिमियर मंगलबार साँझ काठमाण्डौको कमलपोखरीस्थित बिग मूभिजमा आयोजना गरिएको थियो । माओवादी सशस्त्र द्वन्द्वको पृष्ठभूमिमा निर्माण गरिएको फिल्म हेर्न प्रिमियरमा राजनेता, चलचित्रकर्मी र पत्रकारहरूको बाक्लो उपस्थिति थियो ।

प्रिमियरमा उपस्थित प्रतिनिधि सभा सांसद ज्ञानेन्द्र शाही, निर्देशक निश्चल बस्नेत, रामबाबु गुरुङ, कोरियोग्राफर रेनेशा वान्तवा राई, अभिनेता सलिनमान बनियाँ, आशीर्वाद क्षेत्री, अभिनेत्री गौमाया गुरुङ लगायतका हस्तीहरूले निर्देशक अशोक थापा मगरको निर्देशन तथा मुख्य कलाकार धिरज मगर र उपासना सिंह ठकुरीको अभिनयको खुलेर प्रशंसा गरे । सांसद शाहीले ‘खुस्मा’लाई फिल्म भन्दा पनि द्वन्द्वकालको दस्तावेजको रूपमा व्याख्या गर्दै, यो सिनेमा नहेरेसम्म नेपाललाई पूर्ण रूपमा बुझ्न नसकिने बताएका थिए ।

निर्देशक निश्चल बस्नेतले पनि अशोक थापाले कथालाई उत्कृष्ट रूपमा प्रस्तुत गर्न सफल भएको बताए । कोरियोग्राफर रेनेशा वान्तवा राईले केही दृश्यहरूले आफूलाई भावुक बनाएको बताउँदै, धिरज र उपासनाको अभिनयको तारिफ गरिन् । प्रिमियरमा फिल्म हेरेका धेरै दर्शकहरूले द्वन्द्वको असर र प्रभावलाई पर्दामा जीवन्त रूपमा महसुस गरेको बताए ।

‘खुस्मा’ एम मिडिया प्रालिको ब्यानरमा निर्माण गरिएको हो । जसको लेखन तथा निर्देशन अशोक थापा मगरले गरेका हुन् । दीपक बज्राचार्यको छायांकनमा तयार यस फिल्मका गीत र ट्रेलरले ट्रेन्डिङमा शीर्ष स्थान पाएको छ । फिल्ममा धिरज, उपासना, माओत्से गुरुङ, खड्क बहादुर पुन (खबपु), सुजाता राई लगायतका कलाकारहरूको अभिनय देख्न सकिन्छ । फिल्मको निर्मातामा विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर छन् भने सह-निर्माता सुस्मिता बुढाथोकी हुन् ।