इटहरी/ असोजको ३ गतेबाट सार्वजनिक प्रदर्शनमा आउने फिल्म ‘खुस्मा’को ट्रेलर सार्वजनिक गरिएको छ । अभिनेता धिरज मगरको जन्मदिनको अवसर पारेर मंगलबार काठमाडौमा आयोजित एक विशेष समारोहमा फिल्मको ट्रेलर रिलिज गरिएको हो । चार मिनेट लामो ट्रेलर सार्वजनिक भए पश्चात धिरजको जन्मदिनको केक काटेर सेलिब्रेसन गरिएको थियो । ट्रेलरमा जनयुद्धको प्रभावबीच अंकुराएको प्रेम कथा र माओवादी सशस्त्र द्वन्द्वपछि श्रीमानको प्रतिक्षामा रहेकी एक श्रीमतीको संघर्षलाई चित्रण गरिएको छ ।
फिल्ममा धिरज मगर र उपासना सिंह ठकुरीलाई प्रेमी-प्रेमीकाको रूपमा प्रस्तुत गरिएको छ । ट्रेलरमा उनीहरूको अभिनयले दर्शकको मन जित्ने विश्वास गरिएको छ । अभिनेता मगरले आफ्नो जन्म गाउँमा सिनेमा छायांकन गर्ने अवसर पाउँदा उत्साहित भएको बताउँदै निर्देशक अशोक थापा मगरप्रति आभार व्यक्त गरेका छन् । उनले दुई वर्षको उमेरमा युके गएकाले आफ्नो जन्म गाउँको प्रचारप्रसार गर्ने चाहना रहेको र यो फिल्म त्यस उद्देश्यमा महत्त्वपूर्ण भएको बताए । हेर्नुस् ट्रेलर ।
एम मिडिया प्रालिको ब्यानरमा निर्माण भएको ‘खुस्मा’को लेखन तथा निर्देशन अशोक थापा मगरले गरेका हुन् । थापाले यसअघि केही डकुमेन्ट्री फिल्म लेखन तथा निर्देशन गरे पनि यो नै उनको पहिलो ठुलो पर्दाको निर्देशन हो । उनले डकुमेन्ट्री फिल्म मार्फत नौ वटा अन्तर्राष्ट्रिय फिल्म महोत्सवमा आवार्ड जितिसकेका छन् ।
फिल्मका निर्मातामा विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर रहेका छन् भने सह-निर्मातामा सुस्मिता बुढाथोकी छन् । फिल्ममा दिपक बज्राचार्यको छायांकन रहेको छ भने यसअघि सार्वजनिक गीत र टिजरलाई दर्शकले अत्यधिक रुचाएका थिए ।
फिल्ममा धिरज र उपासनाका अलावा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, सारा राई, श्वेता मिश्र, विवेश मगरलगायतका कलाकारको अभिनय रहेको छ । मगर समुदायको परिवेशमा आधारित यो प्रेमकथाले जनयुद्धको समयमा प्रेम र संघर्षलाई पर्दामा उतार्ने छ । फिल्ममा एसडी योगी र कोरियाली संगीतकार छान्जु पार्कको संगीत, सुरेन्द्र राना, राम अविरल बिष्ट र अशोक थापा मगरको गीत रचना रहेको छ । फिल्मको वितरण गोविन्द शाहीको काफिया फिल्म्स्ले गर्नेछ ।
Discussion about this post