रेनुकाको प्रतिबद्धता: ‘मिसेस पुर्बेली आईकन’पछि महिलाहरूको लागि काम गर्ने

इटहरी/ ओपन स्पेस प्रालीले आयोजना गरेको ‘मिसेस पुर्बेली आईकन-२०२४’ कार्यक्रम विवाहित महिलाहरूको लागि सौन्दर्य प्रतियोगिता मात्रै नभएर सीप वृद्धि, बौद्धिक विकास र महिला सशक्तीकरणको माध्यमका रूपमा स्थापित हुँदैछ । यस प्रतियोगिताको मुख्य उद्देश्य महिलाहरूलाई आत्मविश्वास र आत्मबल प्रदान गर्दै उनीहरूको व्यक्तित्व विकासमा योगदान पुर्याउनु हो । शुभेक्षा कार्कीले कोरियोग्राफी गरिरहेको यो प्रतियोगिताको फाईनल प्रतिष्पर्धामा ८ जना महिलाहरूले प्रतिस्पर्धा गरिरहेका छन्, जहाँ रेनुका श्रेष्ठ एक प्रमुख प्रतियोगीका रूपमा प्रस्तुत भैरहेकी छन् ।

रेनुका श्रेष्ठको जीवनयात्रा विशेष छ । उनको बाल्यकाल इटहरी २, हलगड़ा पिपलचोकमा बित्यो । उनका बुबा स्वर्गीय पूर्ण बहादुर श्रेष्ठ र आमा सीता श्रेष्ठ हुन् । सामान्य परिवारमा हुर्किएकी रेनुकाको बाल्यकालमा ठूलो भएपछि घरमा आएका अभावहरू पूरा गर्ने सपना थियो । उनी सबैसँग मित्रवत् व्यवहार गर्थिन् र अरुले भनेका कुराहरू सजिलै स्वीकार गर्थिन् । बाल्यकालदेखि नै उनी ज्ञानी र सबैसँग सजिलै घुलमिल हुने स्वभावकी थिइन् ।

किशोरावस्थामा प्रवेश गरेपछि रेनुकाले प्लसटु सम्मको शिक्षा हासिल गरिन् । उनले नर्स बन्ने सपना देखेकी थिइन्, तर विभिन्न कारणले त्यो सपना पुरा हुन सकेन । उनले सधैं परिवारको सोच र सल्लाहलाई प्राथमिकता दिइन् । युवावस्थामा सिपमूलक तालिमहरू लिएकी उनले त्यसलाई निरन्तरता भने दिन सकिनन् । अहिले मिसेस पुर्बेली आइकन प्रतियोगितामा सहभागिता जनाउनु नै उनको जीवनको पहिलो ठूलो प्रतियोगिता हो ।

विवाहपश्चात् रेनुकाको जीवनले नयाँ मोड लियो । २०५९ साल बैसाखमा उदय कार्कीसँग अन्तरजातीय प्रेम विवाह गरेकी उनले विवाहपछि श्रीमान् र छोराहरू र पुरै परिवारको पूर्ण समर्थन पाएकी छिन् । यो प्रतियोगितामा सहभागी भएपछि उनले आत्मविश्वास बढेको अनुभव गरेकी छिन् । परिवार र साथीभाइको साथले उनलाई थप हौसला समेत दिएको छ । विवाहअघि देखेका केही सपना पूरा भए पनि, उनले अझै केही सपनाहरू पूरा गर्न बाँकी रहेको बताएकी छन् ।

यो प्रतियोगितामा जिते पनि नजिते पनि उनले महिलाहरूको सशक्तीकरणका लागि काम गर्ने प्रतिवद्धता जनाएकी छिन् । उनी अब महिलाहरूलाई अगाडि बढाउन, उनीहरूको क्षमता विकास गर्न र समाजमा योगदान दिनका लागि सक्रिय हुने सोचमा छिन् । उनि भन्छिन्, “जीत हार प्रतिस्पर्धामा स्वाभाविक हो, तर म चाहे विजेता बनूँ या नबनूँ, म महिलाहरूको लागि काम गर्न प्रतिबद्धता गर्दछु।”

यदि उनले यो प्रतियोगिता जितिन् भने मिसेस पुर्बेली आइकन जस्तै अरू प्रतियोगिताहरूमा महिलाहरूलाई सहभागी गराउन प्रोत्साहित गर्ने बताईन् । साथै, महिलाहरूको सिप, क्षमता, र व्यक्तित्व विकासका लागि योगदान दिन अझ सजिलो हुनेछ उनको विश्वास छ । रेनुकाले महिलाहरूको क्षेत्रमा रहेर समाजसेवामा जुट्ने अठोट लिएकी छिन् र उनले यो प्रतियोगिता आफ्नो यात्रा प्रारम्भको रुपमा रहेको समेत बताएकी छन् ।