इटहरी/ ओपन स्पेस प्रालीको आयोजनामा कोशी प्रदेशस्तरीय पहिलो ‘मिसेस पुर्बेली आईकन-२०२४’ भैरहेको छ । यो प्रतियोगिता केवल सौन्दर्य प्रदर्शनको मात्र नभएर विवाहित महिलाहरूको बौद्धिक विकास, सीप वृद्धि, आत्मबल र महिला सशक्तीकरणको दिशामा सहयोग पुर्याउने उद्देश्यले आयोजना गरिएको छ आयोजक संस्था ओपन स्पेस प्रालीका निर्देशक सरोज श्रेष्ठले जानकारी गराए । कार्यक्रमको कोरियोग्राफरको रुपमा शुभेक्षा कार्की रहेकी छन् । प्रतियोगितामा फाईनलका लागी आठ जना विवाहित महिलाहरू सहभागी भएका छन् । जसमा सुस्मा बिस्ट पनि प्रतिष्पर्धी मध्येकी एक हुन् ।
प्रतियोगितामा सहभागी सुस्मा बिस्टको बाल्यकाल इलामको सुन्दर पहाडी क्षेत्र कन्याममा बित्यो । बुवा डोर बहादुर पौडेल र आमा सीता पौडेलको कोखबाट उनी सामान्य परिवारमा जन्म लिएकी हुन् । प्लस टु सम्मको पढाइ गरेकी उनले बाल्यकालको स्मरण गर्दै बालापनमा देख्ने सपनामा आफूलाई असल व्यक्ति बनाएर समाजमा चिनाउने थियो भने उनलाई सानैदेखि ज्ञानप्रेमी, सुशील र मायालु स्वभावको रूपमा चित्रित गरिन्थ्यो ।
किशोरावस्थामा सुस्मा बिस्टको सोच टिभीमा आउनु थियो, जुन अहिले ‘मिसेस पुर्बेली आईकन’को मञ्चमा आएर पूरा भइरहेको उनी बताउछिन् । प्लस टु अध्ययनकै क्रममा विवाह बन्धनमा बाँधिएकी सुस्माले सिपमूलक तालिमहरूमा भाग लिने अवसर पाएकी थिइन्, जसले उनको व्यक्तित्वलाई अझ परिस्कृत बनाउन सहयोग गर्यो । उनी विशेष रूपमा नृत्यमा सक्रिय थिइन् र किशोरावस्थादेखि नै नृत्य प्रतिस्पर्धामा सहभागी हुँदै आइरहेको बताउछिन् । उनका अनुसार, आफुले जीवनमा थुप्रै सल्लाह र मार्गदर्शन आफ्नै परिवारबाट पाएका हुन् ।
विवाहपछि सुस्मा बिस्टको जीवनमा धेरै परिवर्तनहरु आए । २०७१ साल जेठ ३ गते श्रीमान् राज बिस्टसँग मागी विवाहमा बाँधिएकी उनलाई विवाहपश्चात् श्रीमान्, माइती र घरका अन्य सदस्यहरूबाट पूरै सहयोग मिलिरहेको छ । आफूले विवाहअघि देखेका केही सपना विवाहपश्चात् पूरा गर्न सफल भएकी छिन्, र उनले मिसेस पुर्बेली आईकन प्रतियोगितामा भाग लिँदै थप सपना पूरा गरेको सुनाईन् । उनका लागि यो प्रतियोगिता आफ्नो पहिचान स्थापित गर्ने एक महत्वपूर्ण अवसर हो ।
सुस्मालाई विवाहपछि कुनै सौन्दर्य प्रतियोगितामा भाग लिने अवसर यसअघि मिलेको थिएन । तर यस प्रतियोगितामा सहभागी भएपछि उनले आफ्नो व्यक्तित्वको विकासमा ठुलो परिवर्तन आएको बताउछिन् । उनले बौद्धिक क्षमता, बोल्ने तरिका, आत्मविश्वास र समाजमा कसरी अघि बढ्ने भन्ने कुराहरू यो सौन्दर्य प्रतियोगिता ‘मिसेस पुर्बेली आईकन’ बाट सिक्न मद्दत पुर्याएको उल्लेख गरिन् । उनका अनुसार प्रतियोगितामा सहभागी भएपछि परिवारका सदस्यहरू, साथीभाइ र माइती पक्षबाट निरन्तर सकारात्मक प्रतिक्रिया पाउँदै आएकी छन् ।
सुस्मा भन्छिन् ‘मिसेस पुर्बेली आईकन’मा भाग लिँदै गर्दा आफ्नो एउटा मुख्य सपना पूरा हुँदैछ । उनले प्रतियोगिता नजितेपनि आफुलाई सफल ठान्ने बताउछिन्, किनकि प्रतियोगितामा सहभागिता नै उनका लागि सफलता हो । उनले आफूलाई समाजका अन्य महिलाहरूका लागि प्रेरणाको श्रोत बनाउन चाहन्छिन् । यदि सुस्माले प्रतियोगिता जितेमा आफ्नो समाजका बालबालिकाका लागि बाल स्कुलमा सहयोग गर्ने योजना बनाएकी छिन् । साथै, उनले विवाहित महिलाहरूलाई सशक्त बनाउन र उनीहरूको आत्मनिर्भरता बढाउन विभिन्न कार्यक्रमहरू सञ्चालन गर्ने सोच बनाएकी छिन् । सुस्माले महिलाहरूको व्यक्तित्व विकास र आत्मबलको क्षेत्रमा योगदान पुर्याउने अठोटका साथ प्रतियोगितामा सहभागिता जनाएकी हुन् ।
Discussion about this post