अभिनेता सलोन बस्नेतको निर्माणमा फिल्म ‘रंगी’ घोषणा, असोज ११ देखी छायांकन गर्ने

इटहरी/ अभिनेता सलोन बस्नेत अब फिल्म निर्माणमा होमिने भएका छन् । उनी प्रस्तुतकर्ता रहनेगरी फिल्म ‘रंगी’ सलोन सलिना फिल्मस् प्रालिको ब्यानरमा निर्माण हुने भएको हो । सुरेश न्यौपानेले यस फिल्ममार्फत निर्देशनमा डेब्यू गर्न लागेका छन् । उनले ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’, ‘कृ’ लगायतका फिल्ममा मुख्य सहायक निर्देशकको रूपमा काम गरेर अनुभव बटुलेका छन् ।

निर्माण घोषणा गरेसंगै यो फिल्मको पोस्टर सार्वजनिक गरिएको छ । जहाँ एक साइकलमा बसिरहेकी बालिका र उनीसँग खेल्दै गरेको एक पुरुष देख्न सकिन्छ । यो दृश्यले बाबु-छोरीको सम्बन्धलाई चित्रण गर्ने संकेत गर्छ । साथै, सूर्यास्तको पृष्ठभूमिले दृश्यलाई थप भावनात्मक बनाएको छ ।

फिल्मको निर्माण सक्षम सुवेदीले गर्नेछन् भने लेखन सुमन गजमेरले गरेका छन् । छायांकनका लागि सौरभ लामाको चयन भइसकेको छ । यद्यपि, फिल्मका कलाकारहरूको फाइनल छनोट हुन बाँकी छ । फिल्मको छायांकन असोज ११ गतेदेखि काठमाडौंमा सुरु गरिने बताईएको छ ।