मिसेस पुर्बेली आईकनकी प्रतिष्पर्धी सुनिता घरेलु हिंसा, अन्याय र अत्याचारको विरुद्धमा बोल्ने

इटहरी/ कोशी प्रदेश स्तरीय पहिलो ‘मिसेस पुर्बेली आईकन-२०२४’ प्रतियोगिता ओपन स्पेस प्रालीको आयोजनामा इटहरीमा भैरहेको एक महत्वपूर्ण सौन्दर्य प्रतियोगिता हो । यो प्रतियोगिता अन्य सौन्दर्य प्रतियोगिता जस्तो मात्रै नभएर विवाहित महिलाहरूको सिप वृद्धि, बौद्धिक विकास, व्यक्तित्व निखार्नका साथै उनीहरूको आत्मविश्वास र आत्मबललाई सुदृढ पार्दै महिला सशक्तीकरणको क्षेत्रमा अग्रसर गराउने उद्देश्यले आयोजना गरिएको हो । जसको कोरियोग्राफीको जिम्मेवारी मिडियाकर्मी तथा कोरियोग्राफर शुभेक्षा कार्कीले सम्हालेकी छन् ।

यो प्रतियोगिता महिला सशक्तीकरण र विवाहित महिलाहरूलाई आत्मनिर्भर बन्ने प्रेरणा दिनु यसको प्रमुख लक्ष्य हो । ‘मिसेस पुर्बेली आईकन’ प्रतियोगितामा ८ जना प्रतिष्पर्धीहरु विभिन्न जिल्लाबाट सहभागी भएका छन् । जसमध्येकि एक हुन् सुनिता पुरी । जो यस प्रतियोगितामा सहभागिता जनाउँदै आफ्नो जीवनको महत्वपूर्ण मोडका अनुभवहरूलाई साट्दै अगाडि बढिरहेकी छन् । उनका अनुसार, यो प्रतियोगिता उनीजस्तै अन्य महिलाहरूका लागि पनि आफ्ना व्यक्तित्वलाई अझ मजबुत बनाउने अवसर हो । यस प्रतियोगिताले विवाहित महिलाहरूलाई समाजमा आफ्नो पहिचान स्थापित गर्न थप मार्गदर्शन गर्छ ।

सुनिता पुरीको बाल्यकाल र प्रारम्भिक जीवन:

‘मिसेस पुर्वेली आईकन’ प्रतिष्पर्धी सुनिता पुरीको जन्म मोरङको पथरीमा भएको हो । उनी पदम बहादुर घतानी र मनमायाँ घतानीकी कोखबाट जन्म लिएकी हुन् । सामान्य परिवारमा हुर्किएकी सुनिता बुझ्ने हुँदादेखी नै आफ्ना सपना र उद्देश्यहरू प्रति स्पष्ट थिइन् । आफूलाई बाल्यकालमा असल र ज्ञानि ठान्ने उनलाई बालापन देखी नै कलाकार बन्ने ठूलो रहर थियो ।

उनको अध्ययनको बारेमा कुरा गर्दा उनले प्लस टु तहसम्मको अध्ययन सम्पन्न गरेकी छिन् । पढाइलाई आफ्नो मुख्य प्राथमिकतामा राख्दै अघि बढेकी सुनिताले आफ्नो जीवनलाई राम्रोसँग व्यतीत गर्ने प्रयास गरिन् । उनी बाल्यकालदेखि नै आफ्नो लक्ष्य प्रति केन्द्रित रहिन्, जसका कारण उनले आफूलाई सधैं अनुशासित बनाईराखिन् ।

किशोरी र युवावस्थाको संघर्ष:

सुनिताको किशोरावस्थामा धेरै सपना र सोचहरु थिए । उनले प्लस टु सक्काएपछि विवाह गरिन् । विवाह अगाडि पनि उनले आफ्ना व्यक्तिगत विकास र सशक्तीकरणमा धेरै कुरा सिक्ने अवसर पाएकी थिइन् । जब उनी किशोरी थिइन्, उनका केही सपनाहरू पूरा भएका थिए भने केही अधुरा पनि थिए ।

तथापि, उनले यो सोच बनाई राखिन् कि अधुरा रहेका सपनाहरूलाई पनि भविष्यमा पुरा गर्न सकिन्छ । किशोरावस्थामा सुनिताले विभिन्न प्रतियोगिताहरूमा सहभागी हुन मौका पाइन् । उनले विवाह अगाडि केही प्रतियोगिताहरूमा पनि सहभागिता जनाइसकेकी थिइन् । जसले उनीमा आफूलाई अगाडि बढाउने आत्मबल मिलेको थियो ।

विवाह पछिको जीवन:

सुनिताले आफ्नो जीवनको अर्को महत्वपूर्ण निर्णय प्रेम विवाह गरेर सुरु गरिन् । उनी र उनका श्रीमान सन्तोष पुरीबीचको सम्बन्ध प्रेममय थियो र उनीहरू २०६७ साल बैशाख १ गते वैवाहिक बन्धनमा बाँधिएका थिए । विवाहपछि सुनिताले श्रीमानको मात्र नभएर सम्पूर्ण परिवारको पनि साथ र समर्थन पाइरहेकी छन् । उनको जीवनमा श्रीमानको भूमिका महत्वपूर्ण रहेको छ, जसले उनलाई प्रत्येक पाइलामा साथ दिँदै हौसला प्रदान गरेका छन् । परिवारका अन्य सदस्यहरूबाट पनि माया र सहयोग उनले सधैं पाएकी छन् ।

यो प्रतियोगितामा सहभागी भएपछि सुनिताले आफ्नो आत्मबलमा ठूलो वृद्धि भएको महसुस गरेकी छन् । उनी भन्छिन्, ‘यो प्रतियोगिताले आफुलाई अझ आँटिलो र साहसी बनाएको छ।’ यो मिसेस पुर्बेली आईकनमा सहभागी भएपछि उनको व्यक्तिगत र सामाजिक जीवनमा सकारात्मक परिवर्तन आएको छ । साथीभाई, घरपरिवार र माईत सबैबाट उनलाई निकै माया र समर्थन प्राप्त भइरहेको छ । यो सबैले उनलाई अगाडि बढ्न हौसला प्रदान गरेको छ ।

प्रतियोगिताबाट प्राप्त ज्ञान र भविष्यको योजना:

उनको दृष्टिकोणमा यो प्रतियोगिता उनीहरू जस्ता विवाहित महिलाहरूका लागि एउटा ठूलो अवसर हो । यदि प्रतियोगिता नजितेपनि उनले यसबाट नयाँ ज्ञान र अनुभवहरू बटुल्न सकेको सुनाउछिन् । उनले प्रतियोगितामा प्राप्त हुने ज्ञान र अनुभवलाई आफ्नो जीवनमा लागू गर्ने योजना बनाएकी छिन् । तर, आफुले यो प्रतियोगिता जितेको खण्डमा भने महिलाहरूको हकहित र सशक्तीकरणका लागि कार्य गर्ने योजना बनाएको उनको भनाई छ ।

विशेषगरी उनले समाजमा घरेलु हिंसा, अन्याय र अत्याचारको सामना गरिरहेका महिलाहरूलाई सहयोग गर्न चाहन्छिन् । उनले महिलाहरूलाई शिक्षित र आत्मनिर्भर बन्न प्रेरित गर्न आफ्नो भूमिका महत्वपूर्ण बनाउन चाहन्छिन् । उनका विचारमा महिलाहरूले कहिल्यै पनि अन्याय सहेर चुप लागेर बस्नु हुँदैन, बरु आफ्नो हक र अधिकारका लागि आवाज उठाउनु पर्छ । यो प्रतियोगिताबाट प्राप्त अनुभवका आधारमा उनले महिलाहरूलाई समाजमा आफ्नो पहिचान स्थापित गर्न प्रेरित गर्ने योजना बनाएकी छिन् ।