‘मोहर’को टिजर सार्वजनिक: पल शाहको फरक लुक्स, देउकीको अनकही कथा

इटहरी/ आउँदो साउन २३ गते प्रदर्शनमा आउने तयारीमा रहेको फिल्म ‘मोहर’ को १ मिनेट १८ सेकेन्ड लामो टिजर ओएसआर डिजिटलको युट्युब च्यानलबाट सार्वजनिक भएको छ। यो टिजरले नेपाली समाजको एउटा अलिखित नियम र परम्परा, अर्थात् ‘देउकी’ प्रथा को कथालाई पर्दामा उतार्ने संकेत दिएको छ।

सार्वजनिक टिजरमा पल शाह लाई दुई फरक अवतारमा देखाइएको छ, जसले दर्शकको कौतुहलता बढाएको छ। एक अवतारमा उनी लामो कपालसहित बेनिशा हमाल र बाल-कलाकार सारा शर्मासँग जोडिएको कथामा देखिन्छन्। अर्को अवतारमा छोटो कपाल पालेका पलको कथा नायिका नीति शाह सँग बुनिएको छ। यी दुई फरक लुक्स र कथाहरूले फिल्मको रहस्यमय पाटोलाई उजागर गर्दै दर्शकलाई हलसम्म तान्ने निश्चित छ।

फिल्म मेकर्स प्रा.लि.को प्रस्तुतिमा तयार भएको ‘मोहर’ का निर्माता चुम्बन जंग शाही हुन्। ओम प्रतिकको लेखन तथा निर्देशनमा बनेको यो फिल्ममा पल शाहका साथै अर्जुन जंग शाही, बेनिशा हमाल, नीति शाह, मिथिला शर्मा, रविन्द्र झा, लक्ष्मी गिरी, मिस पबी, सुशिल देवकोटा, लक्ष्मीनाथ तिमिल्सिना, सिद्धार्थ सिंह, माधव दत्त पण्डित, गीता थापा, नविन खतिवडा र बाल-कलाकार सारा शर्माको महत्त्वपूर्ण भूमिका छ।

फिल्ममा कुमार महर्जन को एक्सन, कविराज गतहराज र रामजी लामिछाने को कोरियोग्राफी, समीर मिया को भीएफएक्स, सत्यम राना को सीजीआई, सुरेश अधिकारी, थानेश्वर गौतम र एसडी योगी को संगीत, भूपेन्द्र अधिकारी को सम्पादन र दिपेन बस्न्यात को डीओपी रहेको छ। टिजर साहिल खानले तयार पारेका हुन् भने गिरिराज घिमिरे मुख्य सहायक निर्देशक र लक्ष्मणराज पौडेल प्रोडक्सन म्यानेजर छन्। रोशन जंग शाही फिल्मका लाइन प्रोड्यूसर हुन्।’मोहर’ को टिजरले दर्शकमा एउटा फरक कथा हेर्ने उत्सुकता जगाएको छ। साउन २३ गते फिल्म प्रदर्शनमा आएपछि यसले कस्तो प्रतिक्रिया पाउँछ, त्यो हेर्न बाँकी नै छ।

@parikalanewsofficial