फागुन २ गते प्रदर्शन हुने ‘रङ्गी’ को ट्रेलर सार्वजनिक, बाबु-छोरीको सम्बन्धको मार्मिक कथा

इटहरी/ फागुन २ गते प्रदर्शन हुने नेपाली फिल्म ‘रङ्गी’ को ट्रेलर सार्वजनिक भएको छ । सान्भी इन्टरटेनमेन्ट प्रालिको ब्यानरमा निर्माण भएको यस फिल्मको ट्रेलर शुक्रबार काठमाडौंमा आयोजित एक विशेष समारोहमा सार्वजनिक गरिएको हो ।
ट्रेलरले बाबु-छोरीबीचको प्रेम, संघर्ष, हास्य र भावनात्मक क्षणहरूको मिश्रण प्रस्तुत गर्दछ ।

अभिनेता सलोन बस्नेत को विवाह र छोरी आयुषी ढकालको जन्मबाट सुरु हुने कथा पारिवारिक प्रेम, समर्पण र चुनौतीको कथावस्तुमा केन्द्रित देखिन्छ । ट्रेलरमा नम्रता श्रेष्ठ र आयुषी ढकालको मित्रता तथा सलोन, नम्रता र आयुषीबीचको सम्बन्धलाई विशेष स्थान दिइएको छ । हेर्नुस् ट्रेलर:

ट्रेलरको अन्त्यतिर स्टेजबाट बाबु प्रती देखाएको आयुषीको प्रेम र संवादले दर्शकको मन छोएको छ । साथै, उनलाई सिटी स्क्यान मेसिनमा राखिएको दृश्यले उनको स्वास्थ्यलाई लिएर केही गम्भीर संकेत गरेको अनुमान गर्न सकिन्छ । फिल्मकी निर्मात्री करिश्मा केसी बस्नेतले ‘रङ्गी’ ले बाबु-छोरीको सम्बन्धलाई नयाँ ढंगले प्रस्तुत गर्ने बताइन् । प्रस्तुतकर्ता समेत रहेका अभिनेता सलोन बस्नेतले यसलाई संघर्ष र मायाको कथाका रूपमा बुझ्न आग्रह गरे ।

निर्देशक सुरेश न्यौपानेले यो फिल्मलाई केवल कथा नभई गहिरो भावना समेट्ने प्रस्तुति भएको बताए । अभिनेत्री नम्रता श्रेष्ठ ले यस फिल्ममा काम गर्दा सहज महशुस गरेको बताइन् भने बाल कलाकार आयुषी ढकाल ले दर्शकले ट्रेलरलाई मन पराउनेमा आफू ढुक्क रहेको प्रतिक्रिया दिइन् ।सुरेश न्यौपानेको निर्देशनमा बनेको ‘रङ्गी’मा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय रहेको छ ।