‘मेरो जिन्दगी बिगार्न म आफैं जिम्मेवार छु, वहाँलाई नराम्रो नभन्दिनुस्’- एलिना चौहान

इटहरी/ गायिका एलिना चौहान र उनका श्रीमान विष्णु सापकोटा बीच डिभोर्सको मुद्दा दायर भएको खबर सार्वजनिक भएपछि सामाजिक सञ्जालमा यसबारे चर्को बहस सुरु भएको छ । कतिपयले गायिका चौहानलाई समर्थन जनाएका छन् भने केहीले आलोचना गरेका छन् । एलिनाले अंश र मानाचामल नलिने भन्दै श्रीमान विरुद्ध डिभोर्सको मुद्धा दायर गरेकी छन् ।

यही बीचमा एलिनाले फेसबुक लाईभ मार्फत आफ्नो मनको कुरा राख्दै विवाहको निर्णय हतारमा लिएको स्वीकार गरिन् । ‘मेरो जिन्दगी बिगार्न म आफैं जिम्मेवार छु,’ भन्दै उनले श्रीमानप्रति कुनै दुश्मनी नरहेको स्पष्ट पारिन् । सबैलाई शान्त रहन आग्रह गर्दै उनले भनिन्, ‘आफूले माया गरेको मान्छेलाई अरुले गाली गर्दा, त्यो आफूले गाली खाएको भन्दा पनि पीडादायी हुँदोरहेछ ।

श्रीमान प्रति चिन्ता गर्दै उनले ‘भोलि उहाँलाई केही भइहाल्यो भने म सहन सक्दिनँ। त्यसैले उहाँलाई नराम्रो नभनिदिनु होला, जति गाली गर्नु छ, बरु मलाई नै गर्नुस्।’ भनेकी छन् । एलिनाको यो भावुक अभिव्यक्तिपछि सामाजिक सञ्जालमा थप प्रतिक्रियाहरू आइरहेका छन् । केहीले उनको आत्मस्वीकृतिलाई सकारात्मक रूपमा लिएका छन् भने केहीले यसलाई कमजोरीका रूपमा पनि व्याख्या गरिरहेका छन् ।